Chuki dhidi ya Uislamu nchini Uingereza imezidi kuwa mbaya zaidi, huku Tume ya Haki za Binadamu ya Kiislamu ya Uingereza ikionya kuhusu matokeo ya kuendeleza hali hii.
Katika kumbukumbu ya siku ya kuchapishwa ripoti ya “Mazingira ya Chuki”, Tume ya Haki za Kibinadamu ya Kiislamu ya Uingereza (IHRC) imetangaza kuwa chuki dhidi ya Uislamu nchini humo haijapungua, bali pia imefikia hatua ya kutia wasiwasi zaidi katika mfumo wa kimuundo na kitaasisi; mwelekeo ambao una matokeo mabaya sana ya kijamii na kisiasa.
Katika ujumbe wake mpya wa video, IHRC imesoma tena ripoti yake ya miaka kumi iliyopita “Mazingira ya Chuki” (Environment of Hate), ikisisitiza kwamba chuki dhidi ya Uislamu nchini Uingereza imebadilika katika muongo mmoja uliopita kutoka tatizo la kijamii na kuwa mgogoro wa kimuundo.
Ripoti ya awali ya Tume ya Haki za Kibinadamu ya Kiislamu ya Uingereza (IHRC) ilionya kwamba takwimu rasmi kuhusu uhalifu unaofanywa dhidi ya Waislamu zinaficha picha halisi ya matukio hayo kutokana na kutoripotiwa ipasavyo. Tume hiyo inasisitiza kwamba pengo kati ya takwimu za serikali na hali halisi ya uwanjani limeongezeka, na hali hii inaondoa uwezekano wa kubuniwa sera nzuri.
Tume hiyo inaamini kwamba kushindwa kwa taasisi zinazowajibika kukabiliana na uhalifu wa chuki dhidi ya Waislamu kumefungua njia ya kuongezeka mfumo wa kibaguzi ambao ni zaidi ya chuki ya jadi kueneza propaganda chafu dhidi ya Uislamu na kuwa chuki na vita dhidi ya Uislamu.
Chuki dhidi ya Uislamu na Waislamu, sio tu nchini Uingereza bali pia katika nchi nyingi za Ulaya, imekuwa sera iliyoanzishwa kwa miongo kadhaa Sera hiyo sio tu inatishia usalama wa kijamii wa Waislamu lakini pia kupinga misingi ya demokrasia na madai ya haki za binadamu katika nchi za Magharibi.
Moja ya sababu muhimu zaidi za hali hiyo ni siasa za chuki dhidi ya Uislamu ambazo zimeshamiri katika nchi za Magharibi hususan Uingereza na Ufaransa katika miaka ya hivi karibuni na kuuonyesha Uislamu kuwa ni tishio la kiutamaduni na kijamii na Waislamu kuwa watu wasioaminika na wa kigeni.
Wanasiasa wa Kimagharibi hususan wa vyama vyenye misimamo mikali nyakati za uchaguzi, mara nyingi wamekuwa wakijaribu kuchochea maoni ya umma dhidi ya Waislamu kwa kuwajengea chuki na kuwalaumu kwa kuleta matatizo ya kiuchumi na kijamii katika jamii, na wametumia njia hii kupata kura; mwenendo huu hatimaye umesababisha ongezeko la chuki na ubaguzi dhidi ya Waislamu katika jamii za Ulaya.
Kwa upande mwingine, nafasi ya vyombo vya habari katika kuimarisha sera za chuki dhidi ya Uislamu haiwezi kukanushwa. Vyombo vingi vya habari vya Magharibi, hususan Uingereza, vina mtazamo potovu na wenye upendeleo wa kuandika habari zinazohusiana na Waislamu na Uislamu.
Badala ya kuangazia ukweli, vyombo hivi vya habari mara nyingi vinajenga dhana hasi na potofu miongoni mwa umma kwa kuchapisha taarifa za uongo na upendeleo wa wazi, unaosababisha kuongezeka kwa ubaguzi na unyanyasaji dhidi ya Waislamu.
Sera kama vile “vita dhidi ya ugaidi” na sera kali za uhamiaji ambazo zimekuwa zikitekelezwa katika nchi nyingi za Magharibi hususan katika miaka ya hivi karibuni zimeongeza hisia za kutoaminiana na mivutano kati ya Waislamu na makundi mengine ya kijamii.
Kwa hakika, kwa miaka mingi, si serikali ya Uingereza pekee, bali serikali na vyama vingi vya Ulaya vimejikita zaidi katika kuwakandamiza Waislamu kuliko kukabiliana na ubaguzi wa rangi na ubaguzi, jambo ambalo limezidisha migawanyiko na hitilafu katika jamii za Ulaya kati ya Waislamu na raia wengine.
Kuhusiana na hili, ripoti ya shirika la Uingereza la Tell Mama, linalofuatilia uhalifu wa chuki dhidi ya Waislamu nchini Uingereza, ilifichua kwamba takriban misikiti 22 kote nchini humo imeshambuliwa au kulengwa kwa matamshi ya chuki tangu Juni mwaka huu (2025), hali ambayo imeelezwa kuwa ya kutia wasiwasi sana.
Ujerumani pia, ripoti ya mtandao wa haki za binadamu wa CLAIM inaonyesha rekodi mpya ya matukio ya chuki dhidi ya Uislamu. Hali hii ilimfanya Katibu Mkuu wa Umoja wa Mataifa kuonya hivi karibuni kuhusu ongezeko la sera za chuki dhidi ya Waislamu, na kuzitaja kuwa ni ukiukwaji wa wazi wa haki za binadamu na uhuru wa kimsingi.
Wakati chuki dhidi ya Uislamu imeenea nchini Uingereza na nchi nyingine za Ulaya, nchi za Magharibi siku zote zimejionyesha kuwa ni watetezi wa uhuru, usawa na haki za binadamu, na zimetaja kaulimbiu kama vile uhuru wa kusema, usawa wa raia na demokrasia kuwa ndio msingi wa utambulisho wa kisiasa na kiutamaduni wa Ulaya. Hii ni katika hali ambayo, kuenea kwa siasa za chuki dhidi ya Uislamu ni ukiukaji wa wazi wa kaulimbiu zao zote.
Mgongano huu wa wazi kati ya madai na vitendo umefanya sio Waislamu tu bali pia raia wengine wengi wa Ulaya kuwa na shaka kuhusu madai ya Magharibi.
Hali halisi ya nchi za Magharibi inaonesha kuwa, kuenea siasa za chuki dhidi ya Uislamu si tu kwamba kumewadhuru Waislamu, bali pia kumeiweka misingi inayodaiwa kuwa ya kimaadili na kibinadamu ya jamii za Magharibi kwenye mgogoro wa uhalali na kuporomoka kwa thamani zinazodaiwa kuwa za uhuru na usawa.
Chuki dhidi ya Uislamu katika nchi za Magharibi siku hizi si sera iliyofichwa tena, bali imekuwa chombo cha wazi cha mamlaka katika nchi za Magharibi; chombo kinachofichua sura halisi ya wanasiasa na vyombo vya habari vya Magharibi kwa kukiuka uhuru, usawa na haki za binadamu.
Kuendelezwa siasa za nchi za Magharibi dhidi ya Uislamu kwa hakika ni njia ambayo si tu kwamba itawalenga Waislamu, bali itaiweka jamii nzima ya Magharibi katika kuporomoka kwa maadili na umma kutoaminiana. Ikiwa Magharibi haiwezi kurudi nyuma na kuachana na mwenendo huu mbaya, chuki dhidi ya Uislamu itakuwa ishara ya kuporomoka kwa maadili ya kibinadamu katika ustaarabu ambao hapo awali ulipigia upatu na kuudai kuwa mtetezi wa uhuru na usawa.