Hakimi na Chebbak watuzwa wachezaji bora wa soka barani Afrika

Beki wa kulia wa Morocco, Achraf Hakimi, ameteuliwa Mchezaji Bora wa Kiume Afrika 2025, akimshinda Mohamed Salah wa Misri na Victor Osimhen wa Nigeria, baada ya kuisaidia PSG kushinda Ligi Kuu ya Ufaransa na kombe la Ligi ya Mabingwa ya kwanza kabisa.

Hakimi, aliyekosa nafasi hiyo mwaka 2023 na 2024, ameandikisha historia kuwa Mmorocco wa kwanza kushinda tuzo hii tangu Mustapha Hadji mwaka wa 1998.

Kwa upande wa wanawake, nahodha wa timu ya Morocco ya wanawake, Ghizlaine Chebbak, aliibuka na tuzo ya Mchezaji Bora wa Kike, akimshinda Rasheedat Ajibade wa Nigeria na mchezaji mwenzake Sanaa Mssoudy.

Chebbak amefanya historia kuwa Mmorocco wa kwanza kushinda tuzo hii tangu 2001, baada ya kuwa mfungaji bora katika fainali za CAF 2024 za wanawake.

Washindi hao hupigiwa kura na jopo la wataalamu ambalo linajumuisha wajumbe wa kamati ya ufundi ya Caf pamoja na wanahabari wa Afrika, wachezaji na makocha.

Hakimi aliye na miaka 27 alikuwa amepigiwa upatu kushinda tuzo hiyo kufuatia kushamiri katika timu yake ya taifa na PSG, ikiwa ni pamoja na kufunga bao la kwanza wakati klabu hiyo ya Ufaransa ilipoichapa Inter Milan mabao 5-0 kwenye fainali ya Ligi ya Mabingwa.

Timu yake pia ilishinda Kombe la Uefa Super Cup, Coupe de France na Super Cup ya Ufaransa msimu uliopita, lakini walifungwa kwenye fainali ya Kombe la Dunia la Klabu ya Fifa na Chelsea.

“Kwa kweli ni heshima kwangu kushinda kombe hili la kifahari,” alisema. “Taji hili sio langu pekee – ni la Waafrika wote ambao wana ndoto.”

Hata hivyo, Hakimi sasa anakimbizana na muda kupona jeraha la kifundo cha mguu kabla ya Afcon 2025, itakayochezwa Morocco.

Beki huyo alipanda jukwaa kupokea tuzo kutoka kwa rais wa CAF Patrice Motsepe na Gianni Infantino wa FIFA, akichechemea huku akiwa muangalifu asijitoneshe majeraha.

“Tutafanya kila tuwezalo kulipa taji la Afcon,” aliongeza.

“Tutafanya kila tuwezalo kulipata taji la Afcon,” aliongeza. “Ninawashukuru wataalamu wangu wa tiba na wote wanaoniunga mkono katika kipindi hiki kigumu.”

Nahodha wa Morocco, Ghizlaine Chebbak, ameandika historia kuwa Mmorocco wa kwanza kushinda Mchezaji Bora wa Kike tangu kuanzishwa kwa tuzo hiyo mwaka 2001.

Chebbak alikuwa mfungaji bora katika fainali za Mataifa ya Afrika za Wanawake 2024, akifunga bao maridadi kwenye fainali.

Hata hivyo, Morocco Lionesses walifungwa 3-2 na Nigeria.

“Nimefurahi sana kupokea tuzo hii. Hii ni matunda ya kazi ngumu ya miaka mingi,” alisema Chebbak.

Hata hivyo, kulikuwa na mafanikio kwa Waafrika wa maeneo ya Magharibi kwani Chiamaka Nnadozie wa Brighton alichaguliwa kuwa kipa bora kwa mwaka wa tatu mfululizo.

Mapema katika hafla hiyo iliyofanyika Rabat, Bubista alitangazwa Kocha Bora wa Kiume baada ya kuipeleka Cape Verde kufuzu kwa mara ya kwanza katika historia kwa Kombe la Dunia la Fifa 2026.

“Hii ni ajabu,” alisema kocha huyo mwenye umri wa miaka 55. “Sisi ni nchi ndogo lakini tuna moyo mkubwa.”

Wakati huohuo, Othmane Maamma wa Watford alishinda tuzo ya Mchezaji Chipukizi wa Kiume baada ya kutwaa mpira wa dhahabu katika Kombe la Dunia la vijana chini ya miaka 20 ambako Morocco ilifanya vyema.

“Tulijenga timu iliyoweza kutwaa Kombe la Dunia, na hilo ni jambo la fahari kubwa sana kwangu,” alisema kiungo huyo mwenye umri wa miaka 20. “Nina watu wengi wa kuwashukuru na ninahisi hisia sana.”

Marais William Ruto wa Kenya, Samia Suluhu Hassan wa Tanzania na Yoweri Museveni wa Uganda walipewa tuzo za mafanikio ya kipekee baada ya nchi zao kuwa wenyeji wenza wa Mashindano ya Mataifa ya Afrika (CHAN) 2024 mwezi Agosti.

Nchi hizo tatu za Afrika Mashariki zinatarajiwa kuwa mwenyeji wa Afcon 2027.

Mchezaji Bora wa Kiume: Achraf Hakimi (Paris St-Germain & Morocco)

Mchezaji Bora wa Kike: Ghizlaine Chebbak (Al-Hilal & Morocco)

Kocha Bora wa Kiume: Bubista (Cape Verde)

Mlinda Lango Bora wa Kiume: Yassine Bonou (Al-Hilal & Morocco)

Mlinda Lango Bora wa Kike: Chiamaka Nnadozie (Brighton & Hove Albion & Nigeria)

Timu Bora ya Taifa ya Kiume: Morocco U-20

Timu Bora ya Taifa ya Kike: Nigeria

Klabu Bora ya Kiume: Pyramids (Misri)

Mchezaji Bora wa Klabu Afrika: Fiston Mayele (Pyramids & DR Congo)

Mchezaji Chipukizi wa Kiume: Othmane Maamma (Watford & Morocco)

Mchezaji Chipukizi wa Kike: Doha El Madani (AS FAR & Morocco)

Bao Bora la Mwaka (kupitia kura za mashabiki): Clement Mzize – Young Africans dhidi ya TP Mazembe.

Tuzo za Kocha Bora wa Kike, Mchezaji Bora wa Klabu wa Kike na Klabu Bora ya Wanawake zitatangazwa baada ya kumalizika kwa Ligi ya Mabingwa Afrika ya Wanawake 2025.

Imetafsiriwa na Mariam Mjahidi na kuhaririwa na Ambia Hirsi