Iran imelaani vikali shambulio la hivi karibuni la kigaidi lililofanywa na Israel kwa msaada kamili wa Marekani dhidi ya kambi kubwa zaidi ya wakimbizi ya Palestina kusini mwa Lebanon ikisema kwamba Marekani inahusika moja kwa moja na jinai hiyo.
Kwa uchache Wapalestina 14 wameuawa shahidi na wengine kadhaa kujeruhiwa katika shambulio la kigaidi la Israel dhidi ya kambi ya Ain al-Hilweh karibu na Sidon kusini mwa Lebanon Jumanne jioni.
Leo Alkhamisi, tovuti ya Press TV imenukuu taarifa ya Jumatano ya msemaji wa Wizara ya Mambo ya Nje ya Iran, Esmaeil Baghaei akisema kwamba, mashambulizi ya kikatili ya utawala huo dhidi ya Lebanon yanakiuka sheria zote za kimataifa na Mkataba wa Umoja wa Mataifa. Ameongeza kuwa utawala wa Kizayuni wa Israel umekuwa ukikanyaga mara kwa mara makubaliano ya kusitisha mapigano ambayo uliyasaini kati yake na harakati ya Muqawama wa Kiislamu ya Hizbullah ya Lebanon mwezi Novemba 2024. Baghaei amesisitiza kwamba Marekani ndiyo inayobeba dhima yote ya jinai na ukatili wa utawala wa Kizayuni dhidi ya Lebanon na nchi nyingine za ukanda huu.
Msemaji huyo wa Wizara ya Mambo ya Nje ya Iran pia amelaani ukimya wa jamii ya kimataifa na madola yanayojifanya ni viranja wa kupigania haki za binadamu duniani na kusema kuwa kimya chao kinathibitisha kivitendo kwamba jinai za kivita za Israel zinapata nguvu kutokana na misimamo ya upendeleo ya madola hayo.
Aidha ametoa mwito kwa Umoja wa Mataifa na jumuiya ya kimataifa kuchukua hatua kali za kukomesha jinai za Israel na kuwawajibisha maafisa wake ambao mikono yao imejaa damu za watu wasio na hatia.