India na utawala wa Kizayuni wa Israel zimepanua ushirikiano wao wa kijeshi na kiviwanda kwa kutiliana saini hati mpya ya maelewano na ushirikiano.
Kwa kutiwa saini hati mpya ya maelewano kati ya India na Israel tarehe 4 Novemba, ushirikiano wa kijeshi kati ya pande hizo mbili umeingia katika hatua mpya; makubaliano ambayo, kwa mujibu wa weledi wa mambo, yanaweza kuimarisha utendaji wa Tel Aviv wa kuzusha migogoro na vitendo vya uharibifu barani Asia na kuweka wingu zito katika mlingano wa usalama wa kikanda.
Kwa kutiwa saini hati hii ya maelewano, India na utawala ghasibu wa Israel zitapanua ushirikiano wao wa pande mbili katika nyanja za kijeshi na kiviwanda; hatua ambayo imeelezwa na vyombo vya habari vya pande zote mbili kuwa ni kuimarisha ushirikiano wa kiteknolojia, kielimu na kiviwanda katika nyanja za kijeshi.
Makubaliano hayo yalifikiwa wakati wa safari ya Waziri wa Ulinzi wa India huko Tel Aviv. Wakati wa safari hiyo, ujumbe wa ulinzi wa India ulikutana na makampuni kadhaa makubwa ya silaha, ikiwa ni pamoja na Elbit, Rafael, na Israel Aerospace Industries.
Makampuni haya hapo awali yalikuwa yameonyesha anuwai za ndege zisizo na rubani, mifumo ya ulinzi wa anga, mifumo ya vita vya elektroniki, na vifaa vya hali ya juu vya kuongozwa kwa mbali kwenye maonyesho ya ulinzi ya Aero India 2025.
Kwa mujibu wa ripoti iliyochapishwa na Wizara ya Ulinzi ya India na Wizara ya Vita ya Israel, mkataba huu unajumuisha ushirikiano katika nyanja za mafunzo ya kijeshi, utafiti na maendeleo, teknolojia mpya ikiwa ni pamoja na Akili Mnemba (AI) na usalama wa mtandao, pamoja na uzalishaji wa pamoja wa zana za kijeshi.
Meja Jenerali Amir Baram, Mkurugenzi Mkuu wa Wizara ya Vita ya utawala vamizi wa Israel, ameitaja India kama “mshirika muhimu wa kimkakati” na akasema kwamba Tel Aviv inakusudia kupanua zaidi ushirikiano na New Delhi hata kuliko hapo awali.
India imekuwa mnunuzi mkubwa zaidi wa silaha za Israel, zikiwemo rada za hali ya juu, ndege zisizo na rubani, makombora ya ardhini hadi angani na makombora dhidi ya vifaru, kati ya 2020 na 2024.
Mnamo Agosti mwaka huu (2025), Waziri Mkuu wa India Narendra Modi alitangaza mpango mkubwa wa ulinzi unaoitwa “Mission Sudarshan Chakra,” ambayo sehemu zake zinaweza kufaidika na teknolojia zilizotengenezwa na viwanda vya kijeshi vya Israel.
Kwa mtazamo wa Marekani, kuimarisha uwezo wa kiulinzi wa India mkabala wa China na kuongeza uwezo wa utawala wa Kizayuni wa kukabiliana na vitisho vya kieneo ni miongoni mwa manufaa yatakayotokana na ushirikiano huo.
Kwa upande mwingine, New Delhi inatafuta kuimarisha uzalishaji wa ndani na kupunguza utegemezi wake wa kijeshi kwa kuvutia uwekezaji wa Tel Aviv na teknolojia ya kijeshi kulingana na mpango wa “Made in India”. Kuongezeka uwezo wa utawala wa Kizayuni wa kukabiliana na vitisho vya eneo ni miongoni mwa manufaa yatakayopatikana kutokana na ushirikiano huo.
Hati ya makubaliano ya kijeshi kati ya India na utawala wa Kizayuni wa Israel inaweza kuonekana kuwa chimbuko kushtadi mivutano na ukosefu wa utulivu barani Asia, kwa sababu ushirikiano huo hautavuruga tu mlingano wa nguvu ya kieneo bali pia utafungua njia ya mashindano ya silaha na kupanuka ushawishi haribifu wa Tel Aviv katika eneo. Yafuatayo yanaweza kutajwa katika muktadha huu:
Mosi: Kupanua ushirikiano wa kijeshi na kiteknolojia
Chini ya makubaliano ya hivi majuzi, India na Israel zimeanza ushirikiano mkubwa katika maeneo ya mafunzo ya kijeshi, utafiti na ustawi, teknolojia mpya kama vile Akili Mnemba na usalama wa mtandao, na uzalishaji wa pamoja wa zana za kijeshi. Kiwango hiki cha ushirikiano kitaongeza uwezo wa kijeshi wa New Delhi na Tel Aviv na kinaweza kusababisha wasiwasi miongoni mwa mataifa mengine ya Asia.
Pili: Kuvuruga mlingano wa nguvu Asia ya Kusini
Asia Kusini ni eneo nyeti lenye ushindani mkongwe kati ya India na Pakistan. Kuimarishwa uwezo wa kijeshi wa India, unaoungwa mkono na utawala wa Kizayuni, kutavuruga mlingano uliopo wa nguvu na kuongeza uwezekano wa mashindano ya silaha kati ya nchi hizo mbili. Hali hii inaweza kuwa na taathira hasi kwa usalama wa eneo zima na kushadidisha ukosefu wa usalama na utulivu.
Tatu: Ushawishi haribifu wa utawala wa Kizayuni barani Asia
Utawala wa Kizayuni unatumia hati hii ya maelewano kuimarisha nafasi yake barani Asia. Tel Aviv inatafuta kuuza nje teknolojia za kijeshi na kuunda utegemezi wa kimkakati katika nchi za Asia ili kupanua ushawishi wake wa kisiasa na kiusalama. Ushawishi huu unaweza kuanzisha sera haribifu na zenye kuchochea mvutano za Israel katika milingano ya kiusalama ya Asia.
Nne: Kuongeza ushindani wa kijiopolitiki na kisiasa
Filihali Asia inashuhudia ushindani mkubwa kati ya mataifa makubwa kama vile China, Russia na Marekani. Kuingia kwa utawala wa Kizayuni katika milingano hii kupitia ushirikiano na India kutazidisha hali ya ushindani wa kijiopolitiki na kuleta hali ya kutoaminiana miongoni mwa nchi za eneo. Hali hiyo inaweza kusababisha kuundwa kwa kambi mpya za kijeshi na kuongeza hatari ya migogoro ya kikanda.
Tano: Tishio kwa usalama wa pamoja wa Asia
Hatimaye, mkataba huu sio tu unatishia usalama wa majirani wa India lakini pia unaweka hatarini usalama wa pamoja wa Asia. Kupanuka ushirikiano wa kijeshi na utawala wa Kizayuni kutakuwa mfano wa kuigwa kwa nchi nyingine na kunaweza kuzusha wimbi la makubaliano ya aina hiyo ambayo yatasababisha tu kuyumba na kuongezeka kwa mivutano katika eneo hili nyeti.
Kiujumla, makubaliano ya kijeshi kati ya India na utawala wa Israel yana athari za kieneo na kimataifa zaidi ya ushirikiano wa pande mbili. Kwa kuvuruga mlingano wa nguvu, kupanua ushawishi wa Tel Aviv, na kuimarisha ushindani wa kijiopolitiki na kisiasa, makubaliano haya kwa hakika ni hatua ya kuleta ukosefu wa utulivu katika Asia.