Rais wa Marekani Donald Trump amesema, atakutana na Meya mteule wa Jiji la New York Zohran Mamdani katika Ikulu ya White House siku ya Ijumaa.
“Meya Mkomunisti wa Jiji la New York, Zohran ‘Kwame’ Mamdani, ameomba mkutano. Tumekubaliana kwamba mkutano huu utafanyika katika Ofisi ya Oval siku ya Ijumaa, Novemba 21. Maelezo zaidi yatafuata!” Trump ameandika hayo kwenye jukwaa lake la mitandao ya kijamii la Truth Social Jumatano jioni.
Mamdani, ambaye ni meya wa kwanza Muislamu na mtu mwenye asili ya Asia Kusini wa jiji kubwa zaidi nchini Marekani, aliwashinda gavana wa zamani Andrew Cuomo na mgombea wa Republican Curtis Sliwa katika kinyang’anyiro cha uchaguzi huo uliofanyika mwezi huu baada ya kuendesha kampeni ya kuleta mabadiliko inayolenga kuweka bei nafuu za bidhaa na utoaji huduma za kijamii.
Katika muda wote wa kampeni za uchaguzi huo, Trump alimshambulia mara kwa mara Mamdani mwenye umri wa miaka 34 anayejitambulisha kama Msoshalisti wa Kidemokrati, akimwita “mkomunisti,” huku akimuunga mkono Cuomo na kuonya kwamba anaweza kupunguza fedha za shirikisho kwa Jiji la New York ikiwa Mamdani atashinda.
Trump alieleza pia kwamba anaweza kumfukuza Mamdani, ambaye alizaliwa Uganda na kuwa raia wa Marekani kuanzia mwaka wa 2018.
Katika andiko alilotoa mapema mwezi huu, Mamdani alisema yuko tayari kuzungumza na Trump lakini hatoa tayari kutoa ushirikiano wowote kwake ambao utakuja “kuwagharimu Wamarekani wa New York.”
Timu yake imethibitisha kufanya mawasiliano na kupanga mkutano unaoweza kufanyika kesho Ijumaa.
Wakati huohuo, taarifa ya pili iliyochapishwa na Trump jana Jumatano ilitilia nguvu uwezekano wa kufanyika mkutano huo uliopangwa na akamtaja tena Mamdani kwa jina lake kamili huku akiweka alama za nukuu kwenye jina lake la “Kwame”.
Aliuelezea mkutano huo kuwa ni “unaosubiriwa kwa muda mrefu”.
Mamdani, ambaye atashika rasmi wadhifa wa Umeya wa jiji la New York mwezi Januari, alisema katika hotuba yake ya ushindi kwamba anataka New York iionyeshe nchi “jinsi ya kumshinda rais.”
Aidha, alisema ataliwekea jiji hilo “kinga ya kujihami na Trump” mara tu atakapoingia madarakani, lakini akasisitiza kwamba atakuwa tayari kufanya kazi na mtu yeyote, akiwemo rais mwenyewe, ikiwa tu kufanya hivyo kutakuwa na manufaa na wakazi wa New York…/