Wapalestina walioondoka Gaza hivi karibuni kupitia njia fiche ya uhamishaji inayodaiwa kuunganishwa na ofisi ya wizara ya vita ya Israel wanasema walipelekwa nje ya eneo hilo linalokumbwa na vita bila taarifa, hati, au hata kuelewa walikokuwa wanaelekezwa.
Hayo ni kwa mujibu wa jarida la Kimarekani la The Wall Street Journal.
Shahd Abu Samra, mwenye umri wa miaka kumi na tisa, alisema safari yake ilianza kwa ujumbe mfupi wa simu uliomwagiza kufika saa 11 alfajiri nje ya mgahawa wa samaki mjini Rafah. Ujumbe haukutoa ufafanuzi wowote.
Anasema lengo lake kuu lilikuwa ni kujaribu tu kuondoka ili kuendelea na masomo.
Abu Samra alikuwa miongoni mwa zaidi ya Wapalestina 150 waliojikuta wakisafiri kwa ndege kuelekea Afrika Kusini. Hii ilikuwa sehemu ya misafara ya siri iliyoratibiwa kupitia shirika lijulikanalo kama al-Majd Europe. Inadokezwa kuwa shirika hilo linalomilikiwa na Mzayuni halina ofisi maalumu wala usajili licha ya kudai lina ofisi Ujerumani na Mashariki ya al-Quds.
Tovuti yake haina anwani wala nambari ya simu, na michango inapokewa kupitia fedha za kidijitali pekee.
Abiria walisema walijibu matangazo ya mtandaoni ya al-Majd yaliyodai kuwa na njia ya kutoka Gaza. Baadhi hawakulipa chochote, huku wengine wakitakiwa kulipa kati ya dola 1,400 na karibu dola 3,000 kwa sarafu ya kidijitali ya Tether katika duka la kutuma fedha katikati ya Gaza.
Wasafiri walieleza kuchukuliwa kwa basi kupitia mpakani wa Kerem Shalom, unaodhibitiwa na Israel, kisha kupandishwa ndege katika Uwanja wa Ndege wa Ramon katika utawala wa Israel.
Baadaye pasipoti zao zilirejeshwa bila mihuri yoyote ya kutoka Israel, jambo lililoacha kundi hilo bila uthibitisho wa kuondoka kisheria walipofika Afrika Kusini.
Abiria walisema hawakujua safari yao ilikuwa inaishia Johannesburg mpaka walipopokea tiketi za kupandia ndege wakati ndege iliposomama kwa muda jijini Nairobi.
Ndege ilipowasili Afrika Kusini, maafisa waliwazuia kwa saa kadhaa wakiwa ndani ya ndege wakati mamlaka zikijaribu kutambua kwa nini zaidi ya Wapalestina 150 wamewasili bila nyaraka za wazi za kusafiria au mpango wa kimaelezo.
Shirika la msaada Gift of the Givers, ambalo sasa linawatunza zaidi ya wahamaji 200 waliowasili katika safari za hivi karibuni, limesema wengi wao waliwasili wakiwa na nguo walizokuwa wamevaa tu. Wengi wana mpango wa kuomba hifadhi.
Jarida hilo iliripoti kuwa shirika la al-Majd linafungamana na kile kinachoitwa mamlaka ya uhamaji wa hiari ambayo ni ofisi mpya chini ya wizara ya vita ya Israel. Maafisa wa Israel wamesema wamepunguza ukaguzi kwa Wapalestina wanaotaka kuondoka Gaza.
Jumatatu, Waziri wa Mambo ya Nje wa Afrika Kusini, Ronald Lamola, alisema taifa lake limefungua uchunguzi rasmi kuhusu kuwasili bila taarifa kwa zaidi ya Wapalestina 150 Johannesburg.
Lamola amesema Pretoria haitaki safari zaidi kama hizi zifanyike, akisisitiza kuwa hali iliyoshuhudiwa inaashiria “ajenda iliyo wazi ya kuwaondoa Wapalestina Gaza na Ukingo wa Magharibi.”