Mwakilishi wa kudumu na balozi wa Iran katika taasisi za kimataifa zenye makao yake mjini Vienna Austria amesema kupitishwa azimio la kisiasa dhidi ya nishati ya nyuklia ya Iran yenye malengo ya amani ni jaribio la Marekani na Umoja wa Ulaya ili kufidia kushindwa kwao katika utaratibu wa Snapback huko New York.
Reza Najafi ameeleza haya jana kufuatia kupitishwa azimio na Bodi ya Magavana ya Wakala wa Kimataifa wa Nishati ya Atomiki (IAEA).
Amesema, ripoti ya Mkurugenzi Mkuu wa IAEA Rafael Grossi inaonyesha wazi kuwa hali ya sasa ni matokeo ya moja kwa moja ya mashambulizi ya Marekani na Israel dhidi ya vituo vya nyuklia vya amani vya Iran ambavyo vilikuwa chini ya ukaguzi wa wakala huo.
Najafi pia amesema, IAEA ilitangaza kuwa, kutokana na athari za usalama za mashambulizi hayo, ni jambo lilislowezekana kwa kiasi kikubwa kutekelezwa kwa kawaida makubaliano kwa jina la Safeguard Agreement na kwamba Wakala wa IAEA hata ulilazimika kuwaondoa wakaguzi wake kikamilifu.
Hata hivyo, Iran imethibitisha nia yake nzuri kwa kuafiki maombi yote ya IAEA kwa ajili ya kurejesha shughuli za uhakiki na kuruhusu kufikiwa vituo vyake vya nyuklia ambavyo havikushambuliwa.
Mwakilishi wa kudumu na balozi wa Iran katika taasisi za kimataifa zenye makao yake mjini Vienna Austria amesema: Marekani, na nchi tatu za Ufaransa, Uingereza na Ujerumani zinazounda Troika ya Ulaya au E3 zilijaribu kudhihirisha kwamba kila kitu kiko kama kawaida na kwamba hakuna mashambulizi yoyote yaliyojiri katika taasisi za nyuklia chini ya makubaliano hayo tajwa.
Ameongeza kuwa nchi nne hizo zinaendelea na misimamo yao ya kiburi na kutowajibika na kutoa madai yasiyo na msingi dhidi ya Iran.
Amebainisha kuwa, Marekani na nchi tatu za Ulaya kwa mara nyingine tena zimewasilisha rasimu ya azimio ambalo kwa uwazi limesanifiwa lengo likiwa ni kutoa mashinikizo ya juu dhidi ya Iran na kuendeleza madai ya uwongo ya upotoshaji kuhusu hali ya sasa.