Khatibu wa Swala ya Ijumaa ya leo mjini Tehran amekosoa mashirika ya kimataifa kwa hatua zao zisizo na maana na zisizoaminika, akisema: “Shirika la Kimataifa la Nishati ya Atomiki (IAEA) halina thamani yoyote kwa taifa la Iran.”
Amesema hayo baada ya Bodi ya Magavana ya Wakala wa Kimataifa wa Nishati ya Atomiki (IAEA) kupasisha azimio la kisiasa dhidi ya miradi ya kuzalisha nishati ya nyuklia ya Iran yenye malengo ya amani, ambalo limetajwa kuwa ni jaribio la Marekani na Umoja wa Ulaya ili kufidia kushindwa kwao katika utaratibu wa Snapback huko New York.
Akihutubia maelfu ya waumini walioshiriki ibada ya Swala ya Ijumaa ya leo mjini Tehran, Hujjatul Islam Walmuslimin Mohammad Javad Haj Ali Akbari ameashiria hali ya watu wa Ukanda wa Gaza huko Palestina na hatua za hivi karibuni za baadhi ya nchi za Magharibi, na kuyakosoa mashirika ya kimataifa kwa “vitendo visivyo na maana na visivyoaminika.”
Amelitaja azimio la hivi majuzi la Baraza la Usalama kuhusu Gaza kuwa ni “mchezo wa kamari ambao ndio chanzo kikuu cha maafa ya watu wa Gaza” na akasema: “Mpango huo unatekelezwa kwa msaada wa baadhi ya serikali za nchi za Kiarabu.”
Hatibu wa Swala ya Ijumaa ya leo mjini Tehran amewahimiza watu wa Iran kuendelea kutoa msaada kwa wenzao wa Palestina hususan watu wa Gaza kupitia njia rasmi na zinazoaminika, akisisitiza kwamba: “Taifa la Iran halipaswi kupoteza muda wake kwa ajili ya misimamo isiyo na maana ya nchi za Magharibi, bali linapaswa kudumisha na kuimarisha kusimama kwake kidete na nguvu yake ya kitaifa kwa kutegemea utamaduni wa kujitolea.”
Katika sehemu nyingine ya hotuba zake za Swala ya Ijumaa, Hujjatul Islam Walmuslimin Mohammad Javad Haj Ali Akbari, ametoa salamu za rambirambi kwa kumbukumbu ya siku ya kufa shahidi Bibi Fatima al Zahra, binti kipenzi wa Mtume wetu Muhammad (SAW) inayosadifiana na Jumatatu ijayo, tarehe 3 Jamadithani. Amezungumzia nafasi ya “maisha ya utakasifu wa nafsi” katika uundaji na uimarishaji wa familia, akisisitiza kwamba familia ndiyo taasisi ya msingi ya uumbaji na seli kuu ya jamii ya mwanadamu, ambayo inaweza kuyumba na kudhoofika iwapo utakasifu wa nafsi na maadili mema hayatapewa mazingatio.
Imam wa Swala ya Ijumaa ya Tehran ameyataja maisha ya utakasifu wa nafsi kuwa sharti kuu la uimara, utanashati na ufanisi wa familia na kusema: “Jamii ambayo mahusiano kati ya wanaume na wanawake yanadhibitiwa kwa kuzingatia hekima na sheria za Mungu, familia zake hunawiri na kuimarika, na uaminifu kati ya mume na mke utaongezeka.”
Ameongeza kuwa, mkabala wa matakwa haya ya Mwenyezi Mungu kuna “kambi Shetani” na kusema: “Shetani amekuwa adui wa familia tangu hapo awali na kazi muhimu ya mashetani wa kijini na kibinadamu, ni kuzalisha virusi vya uasherati na utovu wa haya ili kuharibu familia.”