MAPAMBANO dhidi ya ubadhilifu na rushwa ni jukumu la pamoja, si la mtu mmoja au serikali pekee, hivyo wananchi na watumishi wa umma wana wajibu wa kuzingatia uadilifu katika matumizi ya rasilimali za umma.
Kauli hiyo imetolewa na Katibu Tawala Msaidizi Menejimenti ya Ufuatiliaji na Ukaguzi wa Serikali za Mitaa Mkoa wa Arusha, Ramadhani Madeleka, akizungumza kwa niaba ya Katibu Tawala wa Mkoa wa Arusha, Missaile Musa, wakati wa kufunga Kongamano la Mwaka la Mapambano dhidi ya Rushwa na Ufisadi (ACRE).
Madeleka amesisitiza kuwa watumishi na wataalamu wanapaswa kuyatekeleza kwa vitendo maarifa waliopata kupitia kongamano hilo, kwa kuhakikisha mfumo wa matumizi ya rasilimali za umma unazingatia taratibu za manunuzi na ugavi ili kuzuia mianya ya udanganyifu na kuimarisha uwajibikaji.
Amesema ushirikiano baina ya sekta ya umma na binafsi ni muhimu katika kudhibiti mianya ya rushwa na ubadhilifu, hivyo taasisi zote zinapaswa kutekeleza majukumu yao kwa weledi na uwazi. SOMA: Takukuru yapania kudhibiti rushwa, ubadhirifu
Naye Rais wa Taasisi ya Wataalam wa Udhibiti wa Udanganyifu na Rushwa Tanzania (ACFE), Ally Mabrouk, amesema katika siku nne za kongamano hilo washiriki walijengewa uwezo na kubadilishana uzoefu kupitia mada mbalimbali ambazo zimewawezesha kuweka makubaliano ya kuongeza ushirikiano kati ya serikali na taasisi binafsi. Amesema ACFE imeendelea kutoa mchango muhimu katika kusaidia utekelezaji wa ajenda za serikali za kujenga mifumo madhubuti ya uwajibikaji na kupambana na rushwa.