Maafisa wa Marekani na wataalamu wa ulinzi wanasema ndege za kivita aina ya F-35 ambazo Marekani inapanga kuuzia Saudi Arabia zitapungzwa uwezo kwa kiasi kikubwa ikilinganishwa na ndege kama hizo ambazo ziliuziwa utawala wa Israel, lengo likiwa ni kuhakikisha Israel inasalia kuwa yenye silaha bora za Kimarekani katika eneo la Asia ya Magharibi.
Shirika la habari la Reuters liliripoti Alhamisi kwamba ndege hizo ambazo Saudia itazinunua hazitakuwa na baadhi ya mifumo ya hali ya juu na uwezo uliojumuishwa kwenye zile zinazotumiwa na utawala wa Israel.
Kwa mujibu wa maafisa wa Marekani, ndege za Saudi hazitakuwa na mifumo ya juu ya vita vya kielektroniki, silaha zilizoboreshwa, au vipengele vingine vya siri ambavyo Israel imepewa mamlaka ya kuvibadilisha kwa uhuru.
Mchambuzi wa ulinzi Douglas Birkey, mkurugenzi mtendaji wa Taasisi ya Mitchell ya Masomo ya Anga, amesema kwamba hata kama mauzo kwa Saudi yataendelea, ufalme huo huenda usipewe kombora la kisasa AIM-260 Joint Advanced Tactical Missile.
Silaha hiyo ya kizazi kipya cha anga kwa anga inachukuliwa kuwa moja ya teknolojia muhimu na za hali ya juu zinazohusiana na ndege ya kivita ya F-35.
Taarifa hii huu mpya inaonekana kupinga kauli zilizotolewa mapema wiki hii na Rais wa Marekani Donald Trump.
Akiwa na Mrithi wa Kiti cha Ufalme wa Saudia, Mwanamfalme Mohammed bin Salman Ikulu ya White House, Trump alidai kwamba ndege zitakazouzwa kwa Saudi Arabia zitakuwa sawa na zile zilizotolewa kwa Israel.
Sheria ya Udhibiti wa Uuzaji wa Silaha (AECA) inailazimisha Marekani kupunguza au kuzuia uhamisho wa silaha za hali ya juu kwa mataifa ya Kiarabu ili kuhakikisha jeshi la utawala haramu wa Israel linaendelea kuwa bora kivita kuliko majeshi ya nchi za Kiarabu.
Saudi Arabia imekuwa ikifuatilia umiliki wa ndege za kivita F-35 tangu mwaka 2017, kufuatia juhudi kama hizo za Umoja wa Falme za Kiarabu (UAE). Hata hivyo, jitihada za UAE zilikwama chini ya utawala wa Biden kutokana na hofu ya uwepo wa teknolojia ya Kichina katika mitandao ya kijeshi ya UAE.
Haya yanaripotiwa baada ya Mwanamfalme Bin Salman kuahidi kuongeza uwekezaji wa ufalme huo nchini Marekani hadi kufikia dola trilioni moja wakati wa ziara yake Washington na mkutano wake na Trump.
Trump aliripotiwa kumhimiza katika mkutano wa biashara wa pamoja kuchunguza uwezekano wa kuongeza kiwango hicho hadi dola trilioni 1.5.