Mamlaka husika katika Jimbo la Kwara nchini Nigeria zimefunga shule zote katika eneo la Iflodun, Ekiti, Irepodun, Isin na Oke Ero kufuatia vitisho vipya vya usalama katika jimbo hilo.
Lawal Olohungbebe Kamishna wa Elimu katika jimbo la Kwara nchini Nigeria ameeleza kuwa uamuzi wa kuzifunga shule hizo umechukuliwa ili kuwalinda wanafunzi huku vikosi vya usalama vikendelea na msako dhidi ya makundi yanayobeba silaha yanayotatiza hali ya usalama katika eneo hilo.
Lawal ameongeza kuwa, lengo lao ni kuzuia wafanya hujuma kuwatumia watoto kama ngao huku wakikimbia oparesheni zinazoendelea kutekelezwa na jeshi dhidi ya magaidi na makundi ya uhalifu yanayobeba silaha.
Jimbo la Kwara nchini Nigeria limefunga shule katika maeneo hayo tajwa baada ya watu wenye silaha kuivamia kanisa katika eneo la Eruku na hivyo kuibua hofu miongoni mwa wakazi wa jimbo hilo.
Shule za bweni katika eneo la Irepodun pia zimeagizwa kufungwa kufuatia tishio la usalama.
Kufungwa kwa shule hizo katika jimbo la Kwara nchini Nigeria kunazidisha wasiwasi juu ya kushtadi hali ya mchafukose kaskazini mwa Nigeria. Mapema wiki hii, watu wenye silaha waliwateka nyara wanafunzi 25 kutoka Shule ya Sekondari ya Maga Comprehensive Girls katika Jimbo la Kebbi. Mwalimu na mlinzi waliuawa wakati wa uvamizi huo.
Mamlaka za uongozi katika jimbo la Kwara zinasema kuwa shule zitaendelea kufungwa hadi hapo idara za usalama zitakapothibitisha kuwa jimbo hilo lipo salama kwa ajili ya wanafunzi kuanza masomo.