Msemaji wa Rais Cyril Ramaphosa wa Afrika Kusini, Vincent Magwenya amesema, kiongozi huyo hatomkabidhi balozi mdogo wa Marekani urais wa mkutano wa G20 kwa mwaka 2026 baada ya Marekani kusisitiza kuwa haitohudhuria mkutano huo rasmi jijini Johannesburg.
Magwenya ameeleza bayana katika ujumbe alioweka kwenye mtandao wa X: “Rais hatokabidhi kwa balozi mdogo”, akiashiria kukataa Pretoria kukabidhi urais wa G20 wa mwaka ujao wa 2026 kwa inachokiona kama mjumbe wa kidiplomasia wa Marekani wa ngazi ya chini.
Mzozo huo wa kidiplomasia kati ya Washington na Pretoria umepamba moto baada ya msemaji wa Ikulu ya White House Karoline Leavitt kutoa kauli ya dharau kwa Rais Ramaphosa wa Afrika Kusini akisema kiongozi huyo “anaropoka” kuhusu ushiriki wa Marekani katika mkutano huo, kauli ambayo imeishangaza Pretoria na kuchochea shutuma za kuonekana Washington kuwa haiheshimu diplomasia.
Ikulu ya White House ilishaeleza tokea hapo kabla kupitia taarifa fupi kwamba balozi wake mdogo wa mjini Pretoria Marc Dillard, ambaye aliwahi kuwa naibu mkuu wa Balozi jijini Nairobi, Kenya kwa ndiye ambaye angehudhuria hafla ya kupokezana urais wa G20 kama utaratibu tu unavyotakikana mwishoni mwa mkutano, mwishoni mwa wiki.
Uamuzi huo wa Marekani unaonekana sana kama dharau ya kisiasa iliyoelekezwa dhidi ya Pretoria, na ishara ya kuzorota kwa kasi kwa uhusiano wa pande mbili tangu Afrika Kusini ilipowasilisha kesi muhimu katika Mahakama ya Kimataifa ya Haki ICJ ikiushutumu utawala wa kizayuni wa Israel, ambao ni muitifaki mkuu wa Marekani, kwa mauaji ya kimbari ya Wapalestina huko Ghaza, hatua ambayo imeikasirisha sana serikali ya Trump.
Washington imekuwa wazi zaidi katika kuonyesha kutoridhika na msimamo wa Pretoria kimataifa, kuanzia msimamo wake kuhusu Palestina hadi ukaribu wake na Russia na China kupitia jumuiya ya kiuchumi ya BRICS…/