Mjumbe wa Baraza la Uhusiano Baina ya Kaumu Mbalimbali linalosimamiwa na Rais Vladimir Putin wa Russia amesema vikwazo vya nchi za Magharibi dhidi ya Jamhuri ya Kiislamu ya Iran havitafua dafu.
Ismail Shabanov amesema azimio lililopasishwa na Bodi ya Magavana wa Wakala wa Kimataifa wa Nishati ya Atomiki (IAEA) Alkhamisi iliyopita dhidi ya miradi ya kuzalisha nishati ya nyuklia kwa malengo ya amani nchini Iran ni mwenedelezo wa sera za Magharibi na kusisitiza kuwa: Stratijia ya mashinikizo na vikwazo dhidi ya Iran haina faida yoyote na haitakuwa na tija kwa Ulaya na Marekani.
Ismail Shabanov ameongeza kuwa: Bodi ya Magavana wa Wakala wa Kimataifa wa Nishati ya Atomiki kabla ya kushughulikia maudhui ya Iran na kutoa maazimio, inapaswa kuonyesha kwamba inaheshimu sheria za kimataifa na kulaani mashambulizi ya mwezi Juni mwaka huu dhidi ya taasisi za kuzalisha nishati ya nyuklia nchini Iran ambazo zinasimamiwa na wakala wa IAEA na shughuli zao zinafanyika kwa mujibu wa sheria za kimataifa.
Afisa huyo wa ngazi za juu wa Russia amesema, kwa kufumbia macho jinai hiyo iliyofanywa na Marekani na Israel dhidi ya Iran ambayo kwa hakika ni dhidi ya Mkataba wa Kuzuia Silaha za Nyuklia (NPT), Baraza la Magavana wa IAEA limegeuka kuwa mtekelezaji wa sera za nchi za Magharfibi dhidi ya miradi ya kuzalisha nishati ya nyuklia nchini Iran.
Amesema ni wazi kuwa nchi za Magharibi zinataka kuipokonya Iran haki yake ya kuwa na teknolojia ya nyuklia, ilhali kwa miongo zaidi ya minne sasa, taifa la Iran limethibitisha kuwa, halitasalimu amri mbele ya mashinikizo katika njia ya kutimiza malengo yake.