Ripota maalumu wa Umoja wa Mataifa anayefuatilia mauaji ya kiholela amesema kuwa, mashambulizi ya utawala wa Kizayuni dhidi ya raia huko Lebanon ni mfano wa wazi wa jinai za kivita.
Mtaalamu huyo wa Umoja wa Mataifa amelaani mashambulizi ya anga na ndege zisizo na rubani za Israel yanayofanyika karibu kila siku katika maeneo yote ya Lebanon tangu yalipofikiwa makubaliano ya kusitisha mapigano Novemba 27, 2024, akisema kuwa mashambulizi hayo yanadhoofisha juhudi za amani na yanaweza kuwa ni jinai za kivita.
Morris Tidball-Binz, Ripota Maalumu wa Umoja wa Mataifa anayechunguza mauaji ya kiholela, mauaji ya umati na ya watu wasio na hatia amelaani mashambulizi mapya ya Israel dhidi ya Lebanon na kuzungumzia pia shambulio la kikatili mno lililofanywa na utawala wa Kizayuni dhidi ya kambi ya wakimbizi ya Ain al-Hilweh huko Sidon kusini mwa Lebanon na mashambulizi ya mara kwa mara dhidi ya raia na maafisa wa kulinda amani wa Umoja wa Mataifa akisema kuwa hayakubaliki kabisa.
Wizara ya Afya ya Lebanon imeripoti kwamba kwa uchache watu 13 waliuawa na wengine kadhaa kujeruhiwa katika shambulio la anga la Israel kwenye kambi hiyo tarehe 18 mwezi huu wa Novemba. Kwa mujibu wa kituo cha televisheni cha al-Manar cha Lebanon, shambulio hilo la anga la Israel lililenga eneo lenye watu wengi huko Ain al-Hilweh.
Tidball-Binz aidha amesema: “Hili si tukio la kwanza wala la mwisho bali ni sehemu ya mfululizo wa mashambulizi ya Israel ya kuua raia katika maeneo yenye watu wengi, na kupuuza kabisa makubaliano ya kusitisha mapigano na juhudi za kudumisha amani za Lebanon.”