Umoja wa Mataifa umeonya kuhusu kuendelea nchi za Ulaya kuisheheneza silaha Israel licha ya kwamba kuna ushahidi wa kutosha na usiopingika wa jinsi utawala wa Kizayuni unavyotumia silaha hizo kufanya jinai na mauaji ya umati dhidi ya watu wasio na hatia.
Francesca Paola Albanese, Ripota Maalumu wa Umoja wa Mataifa wa masuala ya haki za binadamu katika ardhi za Palestina zinazokaliwa kwa mabavu na Wazayuni vilevile ameukosoa vikali Umoja wa Ulaya kwa msimamo wake wa kibaguzi kuhusu mashambulizi na uvamizi wa utawala wa Kizayuni dhidi ya Ukanda wa Ghaza akisema kwamba umoja huo umejaribu muda wote kuwa kifuniko cha kufichia jinai za Israel na kifutio cha kufutia ukatili wa utawala wa Kizayuni dhidi ya Wapalestina. Amesema: Kuendelea nchi za Ulaya kuimiminia silaha Israel ni hatari kubwa hasa kwa sababu Ujerumani na Italia zinapinga juhudi za kukomeshwa kupewa silaha utawala wa Kizayuni ambao unatumia silaha hizo kufanya jinai dhidi ya binadamu.
Afisa huyo wa ngazi za juu wa Umoja wa Mataifa amesema pia kwamba maangamizi ya kizazi yanayofanywa na Israel huko Ghaza na Ukingo wa Magharibi wa Mto Jordan dhidi ya Wapalestina haujawahi kushuhudia mfano wake katika kipindi cha miaka 80 iliyopita. Amesema, kwa huko Ghaza, asilimia 80 ya wananchi waliobakia baada ya mashambulizi ya kikatili ya miaka miwili ya Israel, hawana kazi wala njia za kupata kipato cha kujidhaminia mahitaji yao huku miundombinu muhimu kama ya maji safi n.k, ikiwa imeharibiwa kikamilifu na Israel.
Moja ya sababu za onyo hilo la Albanese ni kwamba kuendelea nchi za Ulaya kuipa silaha Israel kuna maana ya kushiriki nchi hizo katika ukiukwaji wa haki za binadamu na jinai dhidi ya binadmu huko Palestina. Amesisitiza kwamba uhusiano wa karibu wa nchi za Ulaya na utawala wa Kizayuni si tu unatilia shaka madai ya nchi za Ulaya ya kuheshimu sheria za kimataifa, lakini pia unachochea maangamizi ya mbari na mauaji ya umati sambamba na kushadidisha mgogoro wa kibinadamu huko Ghaza na Ukingo wa Magharibi wa Mto Jordan.
Onyo la Ripota Maalumu wa Umoja wa Mataifa limetolewa katika hali ambayo vita vya kikatili vya Israel dhidi ya Wapalestina hasa wa Ukanda wa Ghaza vimeingia kwenye awamu ya ukatili zaidi na usio wa kawaida. Ripoti zinasema kuwa, karibu watu milioni 1.9 waliobakia katika Ukanda wa Ghaza wamelazimika kuhama makazi yao huku miundombinu muhimu ya eneo hilo ikiwa imeharibiwa kabisa. Albanese amezungumzia pia hali mbaya ya Ukingo wa Magharibi akielezea jinsi Israel inavyoendesha ukatili wa kuangamiza kizazi kwenye eneo hilo, ukatili mkubwa ambao amesema, haujawahi kushuhudiwa mfano wake katika kipindi cha miaka 80 liyopita. Sasa kwa kuzingatia ukatili huo wa kuchupa mpaka wa Israel, hisia za mwanadamu yeyote huru haziwezi kukubaliana na kuendelea nchi za Ulaya kuisheheneza silaha Israel kwani kufanya hivyo kuna maana ya kuchochea jinai zaidi na kushiriki katika ukatili huo dhidi ya binadamu.
Kwa mtazamo wa sheria za kimataifa, nchi za Ulaya zina wajibu pia wa kuacha kuchukua hatua yoyote itakayopelekea kukiukwa haki za binadamu na kufanyika jinai za kivita. Lakini upinzani wa baadhi ya nchi muhimu kama vile Ujerumani na Italia, unakwamisha utekelezaji wa sheria hizo za kimataifa. Lakini upinzani huo umezidi kuwafumbua macho walimwengu na kuona kwamba madai ya Umoja wa Ulaya ya kujifanya ni kiranja wa kutetea haki za binadamu ni chapwa na hayana ukweli wala itibari yoyote.
Vilevile onyo la Ripota wa Umoja wa Mataifa lina mwelekeo pia wa kimaadili. Ulaya, ambayo inajifanya ni chimbuko la demokrasia na haki za binadamu, haiwezi kupuuza matokeo ya moja kwa moja ya siasa zake za kuipa silaha Israel kwani silaha hizo zinatumiwa na Wazayuni kuangamiza mbari ya Wapalestina na kuongeza vifo vya binadamu, uharibifu wa miundombinu na migogoro mikubwa zaidi ya kibinadamu.
Kwa mtazamo wa kisiasa pia, onyo la Albanese linaonesha kuweko pengo kubwa kati ya maneno na matendo ya nchi za Ulaya. Katika upande wa diplomasia ya kimataifa, Umoja wa Ulaya umekuwa ukisisitizia haja ya kupatikana suluhisho la amani la mgogoro wa Palestina, lakini kivitendo unaendelea kuumiminia silaha hatari utawala wa Kizayuni ili kwa niaba ya nchi za Ulaya uendelee kufanya maauji dhidi ya binadamu. Jambo hilo linaonesha wazi kuwa Ulaya haina mwamana na imepoteza itibari yake mbele ya macho ya walimwengu.
Onyo la Ripota wa Umoja wa Mataifa, Francesca Paola Albanese, lina umuhimu mkubwa sana pia katika upande wa kibinadamu. Mgogoro wa kibinadamu huko Ghaza na Ukingo wa Magharibi umefikia hatua ambayo hata mashirika ya kimataifa yanaguswa na jinai hizo na kulazimika kuipa umuhimu misiba mikubwa ya kibinadamu huko Ghaza na Ukingo wa Magharibi. Kwa mtazamo wa mashirika hayo, msaada wowote wa silaha kwa Israel una maana ya kuzidisha mgogoro huo wa kibinadamu. Hivyo, onyo la Albanese si tu ni msimamo wa kisheria lakini pia ni kilio cha nyoyo za binadamu wenye hisia za utu duniani ambao wanapigania kwa njia zote kukomeshwa jinai hizo za Israel dhidi ya Wapalestina.