Jeshi la utawala wa kizayuni wa Israel limefanya mashambulizi makali ya anga katika maeneo tofauti ya Ukanda wa Ghaza, na kuwaua shahidi Wapalestina wasiopungua 24, wakiwemo watoto, katika mwendelezo wa ukiukaji wa makubaliano ya kusitisha mapigano yaliyofikiwa tangu wiki sita zilizopita kwenye eneo hilo la Palestina lililoteketezwa kwa vita.
Mashambulizi hayo ya jana Jumamosi yalijeruhi pia Wapalestina wengine 87.
Mashuhuda wamesema, shambulio la kwanza lililenga gari ya raia kaskazini mwa Jiji la Ghaza, na kufuatiwa na mashambulizi zaidi katikati mwa Deir el-Balah na kwenye kambi ya wakimbizi ya Nuseirat.
Mkurugenzi mkuu wa Hospitali ya al-Shifa, Rami Mhanna amesema, shambulio hilo la ndege zisizo na rubani lililenga kitongoji cha Remal cha jiji hilo la Ghaza na kuuua watu wasiopungua 11 na kuwajeruhi wengine 20.
Wapalestina wasiopungua watatu, akiwemo mwanamke, waliuawa shahidi wakati shambulio la jeshi la kizayuni lilipolenga nyumba huko Deir el-Balah.
Kwa mujibu wa Ofisi ya Vyombo vya Habari ya Serikali ya Ghaza, tangu Oktoba 10 hadi sasa, utawala wa kizayuni umeshakiuka mara zisizopungua 497 makubaliano ya kusitisha mapigano yaliyosimamiwa na Marekani.
Jumla ya raia 342 wameuawa shahidi katika mashambulizi hayo, huku watoto, wanawake na wazee wakiwa ndio waathirika wengi.
Mapema jana Jumamosi wakati jeshi la kizayuni lilipoanzishaa mashambulizi hayo ya kinyama, Harakati ya Muqawama wa Kiislamu ya Palestina HAMAS liliushutumu utawala huo kwa kukiuka makubaliano ya kusitisha mapigano “kwa visingizio vya uwongo” na kuwataka wapatanishi – Marekani, Misri na Qatar – kuingilia kati mara moja.
“Tunawaomba wapatanishi kuingilia kati haraka na kutoa mashinikizo ya kukomeshwa ukiukaji huu mara moja,” ilieleza taarifa ya Hamas na kuendelea kueleza: “pia tunaitaka serikali ya Marekani itimize ahadi zake na kuilazimisha [Israel] itekeleze majukumu yake, na kukabiliana na majaribio yake ya kudhoofisha usitishaji mapigano huko Ghaza”…/