Zohran Mamdani, Meya mpya mteule wa Jiji la New York, amezungumzia suala la ufadhili wa Marekani kwa vita vya mauaji ya kimbari yanayofanywa na utawala wa kizayuni wa Israel dhidi ya Wapalestina katika Ukanda wa Ghaza, katika mkutano aliofanya na rais wa Marekani Donald Trump Ikulu ya White House.
Mkutano huo uliofanyika siku ya Ijumaa ulikuwa wa kwanza wa ana kwa ana kwa wapinzani hao wawili wa kisiasa, ambao wamekuwa wakipingana kuhusu kila kitu kuanzia uhamiaji mpaka sera za kiuchumi.
Meya huyo kijana mwenye umri wa miaka 34 aliwaambia waandishi wa habari kwamba alipozungumza na wakazi wa New York ambao waliwaunga mkono wao wote wawili, yaani Trump na yeye, walisema walitaja sababu mbili kuu zilizowaunganisha, ambazo ni hamu ya “kukomesha vita milele” na “kuhitimisha ufadhili wa dola za walipa kodi waliokuwa wakiufanya kwa ajili ya ukiukwaji wa haki za binadamu.”
Akijibu swali la mwandishi wa habari, Mamdani amesisitiza kwamba Israel imekuwa “ikifanya mauaji ya kimbari” huko Ghaza na kwamba dola za walipa kodi wa Marekani zinasaidia kufadhili mauaji hayo.
Akifafanua zaidi amesema, “nilizungumzia Israel inavyofanya mauaji ya kimbari na nimezungumzia serikali yetu inavyoyafadhili.”
Kwa upande wake, Trump alidai katika mazungumzo hayo kwamba, anaamini Meya mteule wa New York Zohran Mamdani “anaweza kufanya kazi nzuri sana.”
“Naweza kukuambia, baadhi ya mitazamo yangu imebadilika … Ninahisi ninajiamini sana (kusema) kwamba anaweza kufanya kazi nzuri sana. Nadhani kwa kweli atawashangaza baadhi ya watu wahafidhina,” ameeleza rais huyo wa Marekani wakati akimsifu Mamdani kwa ushindi aliopata katika uchaguzi.
Itakumbukwa kuwa, katika muda wote wa kampeni za uchaguzi wa Umeya wa jiji la New York, Trump alimshambulia mara kwa mara Mamdani ambaye anajitambulisha kama Msoshalisti wa Kidemokrati, kwa kumwita “mkomunisti”.
Trump aliwahi kueleza pia kwamba anaweza kumfukuza Mamdani, ambaye alizaliwa Uganda na kuwa raia wa Marekani kuanzia mwaka 2018, na ambaye amekuwa meya wa kwanza Muislamu na mtu mwenye asili ya Asia Kusini wa jiji kubwa zaidi nchini Marekani…/