Marekani imefuta viza ya waziri wa zamani wa Mahusiano ya Kimataifa wa Afrika Kusini Naledi Pandor mapema wiki hii, katika kile kinachoonekana kama hatua za hivi karibuni za Washington kuiadhibu Pretoria kwa sababu kuuburuza utawala wa kizayuni wa Israel katika Mahakama ya Kimataifa ya Haki (ICJ) kwa mauaji ya kimbari uliyofanya dhidi ya Wapalestina katika Ukanda wa Ghaza.
Pandor, ambaye aliongoza Wizara ya Mahusiano na Ushirikiano wa Kimataifa ya Afrika Kusini kuanzia mwaka 2019 hadi 2024, akisifika sana kwa kuongoza kesi ya nchi hiyo dhidi ya Israel huko ICJ, ameviambia vyombo vya habari vya Afrika Kusini kwamba alikuwa amepokea barua pepe kutoka Ubalozi wa Marekani ikisema kwamba viza yake ilikuwa imefutwa mara moja.
Mwanadiplomasia huyo wa Afrika Kusini amesema haelewi kwa nini viza yake imefutwa lakini inaonekana ni kutokana na hatua zake kuhusiana na Palestina.
“Ninaelewa kwamba imewatokea hivi Waafrika Kusini wengine pia,” ameeleza Bi Pandor, na kuongezea kwa kusema: “kuna aina ya unyanyasaji ikiwa mtu hatafuata mstari linapokuja suala la Palestina. Tumeona hatua zikichukuliwa dhidi ya Afrika Kusini kufuatia kesi hiyo katika ICJ”.
Kwa mujibu wa ripoti, Pandor alikuwa amepewa viza ya wageni ya kuingia na kutoka mara kadhaa nchini Marekani na kukaa nchini humo kwa muda mfupi.
Kufutwa viza ya Pandor kumefuatia mashinikizo ya kidiplomasia, kifedha na kisiasa ambayo yakitolewa dhidi ya Afrika Kusini katika kipindi cha miaka miwili iliyopita na serikali za Biden na Trump kwa sababu ya msimamo wake wa kutetea haki za Wapalestina mkabala wa jinai za utawala wa kizayuni wa Israel…/