Jumuiya ya Vituo vya Mgogoro wa Ubakaji ndani ya utawala wa Kizayuni imefichua katika ripoti yake ya kila mwaka kuweko ongezeko kubwa la ukatili wa kijinsia na jinsi serikali ya utawala huo inavyochuja mno na kufanya usiri mkubwa wa ukatili huo ndani ya taasisi zake za kiusalama.
Ripoti ya jumuiya hiyo imetolewa wakati huu wa kukaribia Siku ya Kimataifa ya Kutokomeza Ukatili na Udhalilishaji wa Kijinsia dhidi ya Wanawake yaani Novemba 25, na imechora picha ya wazi ya ukatili na unyanyasaji wa kijinsia katika jamii ya Kizayuni.
Ripoti hiyo si tu inaonesha ongezeko kubwa la ubakaji, unyanyasaji wa kijinsia na ukatili katika sekta za elimu na maeneo ya kazi, lakini pia imefichua mgogoro wa kitaasisi wenye usiri mkubwa wa udhalilishaji na ukatili dhidi ya wanawake ndani ya vyombo vya ulinzi na usalama vya Israel.
Kwa mujibu wa ripoti hiyo, utawala wa Kizayuni hivi sasa una kiwango cha juu mno cha ubakaji kuliko eneo lolote jingine la Asia Magharibi. Kiwango ni kikubwa sana cha ubakaji ndani ya Israel na ongezeko hilo linaitwa na watu wengine ndani ya utawala huo kuwa ni “mgogoro wa kimya kimya.” Taasisi za kupambana na udhalilishaji huo zinasema kuwa, hayo ni matokeo ya moja kwa moja ya kuweko utawala dhaifu, ukosefu wa uwazi na hata usiri na uchujaji mkubwa wa makusudi wa habari unaofanywa na taasisi za serikali.
Jumuiya hiyo imesema kwenye ripoti yake kwamba, mwaka 2024 pekee, ilipokea ripoti zaidi ya 51,000 za unyanyasaji wa kijinsia. Kati ya hao waliofanyiwa ukatili huo, 34,400 ni wale ambao wamenyanyaswa kingono mara nyingi si mara moja tu.
Wengi wa waathiriwa hao ni watoto wadogo. Asilimia 58 ya ripoti zote zinahusiana na kudhalilishwa watoto wadogo na kuonesha uozo wa kimaadili uliokithiri ndani ya Israel.
Ripoti hiyo imesema pia kwamba, wakati serikali ya Netanyahu ilipokuwa inaendesha vita Ghaza, ilisahau mgogoro wa ndani na kesi za unyanyasaji wa kingono ziliongezeka mno ndani ya jamii ya Israel kutokana na mivutano wa kisiasa na athari za kisaikolojia za vita vya Ghaza dhidi ya jamii ya Israel. Unyanyasaji uliongezeka kwa asilimia 45 katika mfumo wa elimu na asilimia 50 kwenye maeneo ya kazi hata kabla ya vita vya Ghaza, na hivi sasa mgogoro huo umeongezeka zaidi.
Vilevile ripoti hiyo imesema kuwa, imepokea taarifa ya kesi 3,000 za unyanyasaji wa kijinsia ndani ya jeshi la Israel katika kipindi mwaka mmoja tu wa vita vya miaka miwili vya Ghaza.