Ulimwenguni kote, kichaa cha mbwa huua takriban watu 59,000 kila mwaka, na karibu 95% ya vifo hivi vikitokea Afrika na Asia. Hii inasababishwa na ongezeko la idadi ya mbwa wanaotangatanga bila chanjo, upatikanaji duni wa matibabu na kushindwa kutolewa taarifa ya ugonjwa huu kwa wakati.
Kichaa cha mbwa ni ugonjwa mbaya, unaoweza kusababisha kifo. Ugonjwa huu husababishwa na virusi vya familia ya Rhabdoviridae na huenea kwa wanadamu kupitia kugusana hasa iwapo mtu atang’atwa na mbwa au kupitia kukwaruzwa na wanyama wanaofugwa majumbani au wale wa mwituni.
Ingawa ugonjwa wa kichaa cha mbwa huhushudiwa katika kila bara duniani lakini maambukizi yake katika nchi nyingi za Afrika yamepindukia kiwango cha wastani. Katika maeneo ya mijini na vijijini, mbwa wanahusika na hadi asilimia 99 ya maambukizi kwa binadamu.
Wataalamu wanasema kuwa ni vigumu kupima kiwango cha maambukizi ya ugonjwa wa kichaa cha mbwa katika nchi za Afrika kwa sababu kesi nyingi haziripotiwi, hasa katika jamii za watu wa vijijini ambako upatikanaji wa vituo vya huduma za afya na zana za kupimia ni mdogo.
Dakta Traore Tiebe, Afisa Masuala ya Ufundi wa Afya ya Wanyama na Wanyamapori katika Shirika la Afya Duniani (WHO) anasema maambukizi ya kichaa cha mbwa mara nyingi hayaripotiwi na hata hutambuliwa vibaya; ndiyo maana WHO haina data kamili.
Dakta Traore anasema: Licha ya kuwa ugonjwa huo kutambulika kuwa miongoni mwa magonjwa makongwe zaidi lakini kichaa cha mbwa kimeendelea kuuwa watu kimya kimya katika baadhi ya maeneo ya Afrika, huku maelfu ya watu wakipoteza maisha kila mwaka katika hali ambayo vifo hivyo hivyo vingeweza kuzuiwa.