Zaidi ya waendesha bajaji 4,000 kutoka mikoa ya Dodoma, Arusha, Morogoro na Tanga wanatarajia kunufaika na mpango wa kuongeza vituo vya usambazaji na ujazaji wa gesi katika mikoa hiyo unaotarajiwa kuanza kutekelezwa na Shirika la Maendeleo ya Petroli Tanzania (TPDC).
Hatua ya kuongezwa kwa vituo hivyo inakuja baada ya shirika hilo TPDC kuagizwa kukabiliana na changamoto ya idadi ndogo ya vituo vya kujazia gesi kwa vyombo vya moto ikiwemo magari na bajaji katika miji minne yenye kasi ya maendeleo ili kuongeza wigo wa ajira na biashara.
Miji hiyo ya Dodoma, Arusha, Morogoro na Tanga ni miongoni mwa miji ya kimkakati ambayo upatikanaji wa huduma za kutosha za uuzaji na usambazaji wa gesi utachochea ukuaji wa biashara na shughuli za usafirishaji ikizingatiwa kuwa bei ya bidhaa hiyo ni ndogo ikilinganishwa na bei ya mafuta.
Agizo la ujenzi wa vituo hivyo limetolewa na Waziri wa Nishati, Deogratius Ndejembi alipokutana na menejimenti ya TPDC jijini Dar es Salaam.
Wajasiriamali wa biashara ya bajaji wanakadiriwa kuwa 750 katika mkoa wa Tanga huku Arusha ikiwa na zaidi ya waendesha bajaji 3500.
Imeandaliwa na @moseskwindi
