Mahakama ya Kimataifa ya Usuluhishi wa Michezo (CAS) imetupilia mbali rufaa ya Guinea iliyoomba timu ya Taifa ya Tanzania ‘Taifa Stars’ ipokonywe haki ya kushiriki Fainali za Mataifa ya Afrika (AFCON) 2025.
Rufaa hiyo ambayo imesikilizwa Novemba 17, 2025, imetupwa baada ya CAS kukubaliana na uamuzi uliofanywa na vyombo viwili vya kisheria vya Shirikisho la Mpira wa Miguu Afrika (CAF).
Vyombo hivyo viwili vya CAF ni Kamati ya Nidhamu na Bodi ya Rufaa.
CAS imebariki uamuzi wa vyombo vya CAF vilivyotupilia mbali rufaa na malalamiko ya Guinea ambayo ilidai timu ya Taifa ya Tanzania ‘Taifa Stars’ ilimtumia kimakosa mchezaji İbrahim Ame.
Kesi hiyo ilianzia katika mechi iliyochezwa Novemba 19, 2024, Dar es Salaam, wakati wa raundi ya mwisho ya mchujo wa kuwania kufuzu kwa Kombe la Mataifa ya Afrika 2025.
Siku hiyo, timu ya taifa ya Guinea, ‘Syli’ ilifungwa bao 1-0 na Tanzania, hivyo kukosa kufuzu wakati ilihitaji sare tu.
Shirikisho la Soka la Guinea (FEGUIFOOT) mara moja liliwasilisha malalamiko kwa Shirikisho la Soka Afrika (CAF), likiituhumu Tanzania kumchezesha mchezaji ambaye hajatambulika, kinyume na kanuni za utambuzi wa wachezaji.
Baada ya Kamati ya Nidhamu na Bodi ya Rufaa ya CAF kukataa malalamiko hayo, FEGUIFOOT ilikata rufaa kwa Mahakama ya Usuluhishi wa Michezo (CAS) Juni mwaka jana.
Kutupiliwa mbali kwa rufaa hiyo, kunazika rasmi matumaini ya Guinea kupata nafasi ya kushiriki AFCON 2025, zitakazofanyika Morocco kuanzia Desemba 21, 2025 hadi Januari 18, 2026.