Inawezakana ugomvi miongoni mwa wanafamilia kusababisha matatizo katika uhusiano wa kidiplomasia baina ya mataifa
Hili linaweza kuwa swali la kiufundi linalohitaji wataalamu wa diplomasia kulichambua kwa kina na kuishibisha jamii maarifa kwa kuipa taarifa, mifano na rejea mbalimbali ili kukidhi kiu ya kuelewa.
Swali hilo ni miongoni mwa maswali yaliyoibuka hivi karibuni baada ya ndugu wawili wa familia moja kuingia katika ugomvi uliosababisha mmoja wao kumtuhumu mwenzake kuhusika na makosa ambayo iwapo yatathibitishwa huenda yakasababisha mgogoro wa kidiplomasia.
Ni ndugu wa familia ya Rais mstaafu wa Afrika Kusini, Jacob Gedleyihhlekisa Zuma, mabinti Duduzile Zuma-Sambudla na Nkosazana Bonganini Zuma-Mncube.
Kwa mujibu wa hati ya polisi tayari jeshi hilo la Afrika Kusini limeanza uchunguzi baada ya Nkosazana kumtuhumu dada yake Duduzile kuhusika na kuwahadaa kwa kazi zenye maslahi wanaume 17 raia wa nchi hiyo kisha kuwapeleka kupigana kama askari wa kukodiwa katika mgogoro wa Urusi na Ukraine bila ridhaa yao.
Msemaji wa polisi wa Afrika Kusini, Athlenda Mathe, amesema kuwa hati hiyo iliandikishwa na Nkosazana inamtuhumu Duduzile na watu wengine wawili waliwalaghai raia wengine 17 kwa ahadi ya kupata mafunzo ya ulinzi wa usalama nchini Urusi kisha kukabidhiwa kwa makundi ya kijeshi ya Urusi na kulazimishwa kupigana dhidi ya Ukraine.
Jeshi la polisi la nchi hiyo limesema bado hakuna mashtaka yaliyofunguliwa na hilo litategemea kukamilika kwa uchunguzi wa kina wa suala hilo.
Je, ugomvi wa familia unaweza kusababisha dola za kibiashara, tawala au nchi kuingia kwenye migogoro ya kidiplomasia
Tafadhali tushirikishe mtazamo wako kwa kutuandikia katika sehemu ya maoni.
Imeandaliwa na @moseskwindi
