Starmer atawaongoza wakuu wenzake kwenye mazungumzo ya kile kinachotajwa “muungano wa walio tayari” baada ya majadiliano ya mwisho wa wiki kati ya Marekani na Kyiv ya kusuluhisha mgogoro na Urusi.
Starmer na viongozi wengine wa magharibi walimepinga mpango wa awali wa amani wa Rais Donald Trump wenye vipengele 28 kabla ya mazungumzo mjini Geneva, na kuibua wasiwasi kuhusu uwezekano wa Ukraine kuachilia maeneo na kupunguza jeshi lake.
Kabla ya mazungumzo haya, Starmer alisema washirika wote katika muungano huo walikuwa wamejikita katika kufikia “amani ya haki na ya kudumu” nchini Ukraine.
Rais Volodymyr Zelenskiy wa Ukraine alisema baada ya mazungumzo ya Geneva “Bado kuna kazi ya kufanya kwa pamoja – ni vigumu sana – kukamilisha waraka huo, na lazima tufanye kila kitu kwa umakini.
Akaahidi “kujadili masuala nyeti na Rais Trump” na kuongeza kuwa: “Ukraine haitakuwa kikwazo kwa amani – hii ndiyo kanuni yetu, kanuni ya pamoja, na mamilioni ya Waukraine” wanategemea, na wanastahili, amani yenye heshima.
Marekani yadaiwa kuishinikiza Ukraine kukubaliana na pendekezo lake
Hata hivyo, taarifa nyingine zimesema, Marekani iliishinikiza Ukraine kukubali mapendekezo yake wakati wa mazungumzo hayo huko Geneva, afisa mmoja wa ngazi za juu aliiambia AFP.
Afisa huyo, akizungumza kwa sharti la kutotajwa jina, alisema Washington haikutishia moja kwa moja kukata misaada ikiwa Kyiv itakataa mapendekezo yake, lakini Ukraine ilikuwa inatambua wazi kuwa uwezekano huo ulikuwa ni mkubwa.
Katika hatua nyingine, Wizara ya nishati ya Ukraine imesema shambulizi “kubwa” lililolenga vituo vya kusambaza umeme limefanywa mapema Jumanne, huku jeshi likiripoti msururu wa droni na makombora yaliyofyatuliwa kuelekea mji mkuu Kyiv.
Kulingana na wizara hiyo, “Wafanyakazi wa nishati wataanza kutathmini matokeo na kuanza ukarabati mara tu hali ya usalama itakaporuhusu.”
Meya wa Kyiv Vitali Klitschko, akiandika kwenye mtandao wa Telegram, alisema shughuli ya kuhamisha watu ilikuwa ikiendelea kwenye jengo refu lililoko kwenye wilaya ya Pechersk katikati mwa jiji hilo, baada ya kushambuliwa .
Picha zilizochapishwa kwenye chaneli zisizo rasmi zilionyesha sehemu za jengo hilo likiwa limeteketea kwa moto.