WATETEZI wa Ligi Kuu Bara Wanawake (WPL), JKT Queens wanaingia kambini kesho Alhamisi kuanza kazi ya kutetea taji kwa kuvaana na Bunda Queens.
WPL ilisimama kwa wiki mbili kupisha kalenda ya Fifa kwa mashindano ya Kombe la Dunia la Futsal yanayoendelea Ufilipino ambapo Tanzania inawania kombe hilo.
JKT ilishindwa kuanza mechi za WPL kwa vile ilikuwa ikishiriki michuano ya Ligi ya Mabingwa Afrika iliyofanyika Misri ambapo ilitolewa hatua ya makundi na sasa ina viporo viwili vya Ligi Kuu itakayorejea Desemba 17.
Akizungumza na Mwanaspoti, Kocha wa JKT Queens, Abdallah Kessy alisema walikuwa na likizo ya wiki moja.
“Wachezaji wengi hawakupumzika vya kutosha na familia. Baada ya kutoka Misri kwenye mashindano ya CAF tuliwapa wiki mbili.” alisema Kessy na kuongeza:
“Nafikiri kwa sasa tunaingia kambini lakini akili zetu zote zinawaza kutetea ubingwa wa ligi hivyo kila mechi kwentu una muhimu mkubwa, hivyo mechi na Bunda kwetu tunaichukulia kwa ukubwa kwa sasa ni mechi ya ufunguzi hivyo tunapaswa kuwa makini.”
Ratiba inaonyesha JKT Queens itaanza na Bunda Queens Desemba 8 kisha Desemba 12 kumalizia kiporo dhidi ya Bilo Queens mechi zote zikipigwa kuanzia saa 10:00 jioni kwenye Uwanja wa Meja Jenerali Isamuhyo uliopo Dar es Salaam.