Hii ni baada ya umoja huo kutuma barua kwa wanachama wake kuteua na kutuma majina ya wanaowapendekeza kuichukua nafasi hiyo inayoshikiliwa na Antonio Guterres kwa sasa. Muhula wa Katibu Mkuu mpya utaanza mwaka 2027.
Katika barua hiyo kwa wanachama wake, Umoja wa Mataifa unatafuta wagombea walio na uzoefu mkubwa katika mahusiano ya kimataifa, diplomasia na walio na weledi wa kuzungumza lugha kadhaa.
“Nafasi ya Katibu Mkuu ni nafasi iliyo na umuhimu mkubwa na inayohitaji viwango vya juu vya utenda kazi, uwezo na maadili na dhamira kuu kwa kanuni za Hati ya Umoja wa Mataifa,” ilisema barua hiyo ya pamoja kutoka kwa balozi wa Sierra Leone ambaye pia ni rais wa sasa wa Baraza la Usalama Michael Imran Kanu na rais wa Hadhira Kuu ya Umoja wa mataifa Annalena Baerbock.
Katibu Mkuu mwanamke
Baadhi ya mataifa wanachama yanapigia debe kuchaguliwa kwa mwanamke katika nafasi hiyo, na katika barua yake, uongozi wa Umoja wa Mataifa umesema “ni jambo la kusikitisha kwamba nafasi hiyo haijashikiliwa na mwanamke” na ukatoa wito kwa nchi wanachama “kuzingatia kuteua wanawake katika nafasi hiyo.”
Baadhi ya majina ambayo tayari yamekuwa yakitajwatajwa ni pamoja na Rais wa zamani wa Chile Michelle Bachelet, Mkuu wa Shirika la Atomiki Duniani IAEA Rafael Grossi ambaye ni raia wa Argentina, na Rebeca Grynspan kutoka Costa Rica.
Kuna utamaduni wa cheo hicho kuzunguka kikanda kwa hiyo kimsingi Katibu Mkuu ajaye anastahili kutokea nchi za Amerika Kusini, ila utamaduni huo huwa haufuatwi kila mara. Barua hiyo inataja umuhimu wa kuzingatia utofauti wa watu wa kanda tofauti ila hautaji kanda maalum.
Watakaoteuliwa watafanyiwa mahojiano hadharani, mchakato uliotumika mara ya kwanza mwaka 2016 ambapo Antoni Guterres alichaguliwa kwa muhula wake wa kwanza.
Mara baada ya Baraza la Usalama kuwasilisha pendekezo lake, Hadhira Kuu inaweza kumchagua Katibu Mkuu aanze kuhudumu katika muhula utakaoanza Januari mosi 2027. Kisheria Katibu Mkuu anakubaliwa kuhudumu kwa mihula miwili tu.