YANGA tayari ipo Algeria kwa ajili ya mechi ya pili ya Kundi B katika Ligi ya Mabingwa Afrika ikitoka kuifumua AS FAR Rabat kwa bao 1-0 wikiendi iliyopita, lakini sasa umesikia kile walichofanyiwa na mabosi wa klabu hiyo?
Mastaa wa timu hiyo wakiongozwa na Pacome Zouzoua, Prince Dube na wengine wamewekewa mezani Sh1 bilioni zilizowafanya wapambane kwa jasho na damu na kuwafunga Far Rabat kupitia bao la Dube, sambamba na mechi ya kesho na nyingine zote zilizofuata za makundi.
Kama ulikuwa unajiuliza ilikuwaje Yanga ikaupiga mwingi kiasi kile wakati wa mechi ya FAR Rabat, basi ni kwamba ukiacha ufundi wa kocha wao mpya Pedro Gincalves, wachezaji wa timu hiyo walipewa ahadi nzito ya kuvuna Sh1 bilioni ndani ya mechi sita tu.
Kabla ya mechi hiyo ya kwanza, kilifanyika kikao kilichowahusisha wachezaji wa Yanga na mabosi wao wakiongozwa na rais wa klabu hiyo, Hersi Said ambapo uongozi umewaambia unataka kuona timu inatinga robo fainali.
Katika malengo hayo mapya wachezaji wa Yanga wameambiwa wanachotakiwa kukifanya ni kupambania timu ishinde tu na kuanzia mechi iliyopita wa AS FAR Rabat waliofanya kweli na kwamba timu ikienda robo tu, basi mzigo wa Sh1 bilioni utakuwa ni wao moja kwa moja.
Mabosi wa Yanga walichofanya ni kutotaka kuwapa presha wachezaji ambapo msimu huu wametumia akili flani ya kugawa malengo ikiwamo katika mechi ya kesho inayokuwa ya kwanza kwa makundi ikiwa ugenini dhidi ya JS Kabylie iliyopoteza kwa mabao 4-1 mbele ya Al Ahly.
Awali itakumbukwa ilitangaza inataka kutinga makundi na ikakamilika na sasa wanaitaka robo fainali ya Ligi ya Mabingwa Afrika.
MASTAA WAFUNGUKA
Mmoja kati ya wachezaji wa klabu hiyo ameliambia Mwanaspoti kuwa wana uhakika na ahadi ya bosi wao.
“Unajua tajiri wetu sio muongeaji ni mtu wa vitendo na ameshatamka kwamba kazi yetu ni kushinda tu tukishaipeleka timu robo, mzigo tunaupata na hajawahi kwenda kinyume.
“Tunahamasishana sana kuhakikisha hatuanguki, ile ya FAR Rabat ni moja tutakwenda kupambana zaidi huko Algeria tushinde hata kupata sare, lakini hatutaki kupoteza kabisa,” amesema mmoja wa wachezaji wa Yanga.
MGAWANYO BALAA
Ukigawanya ahadi hiyo ya Sh1 bilioni ni sawa na kusema kila mchezo ndani ya mechi hizo sita una thamani ya Sh167 milioni. Tayari wachezaji wameshajihakikishia kiasi kama hicho baada ya kushinda mchezo wa kwanza nyumbani Novemba 22, Zanzibar. Mbali na fedha hizo wachezaji wa Yanga wameshajichukulia kiasi cha Sh20 milioni kupitia ahadi ya Rais Samia Suluhu Hassan kununua bao ambalo waliwafunga Waarabu hao.
Yanga itakuwa ugenini dhidi ya JS Kabylie ya Algeria Ijumaa Novemba 28, 2025 ambayo imetoka kuchezea kichapo cha mabao 4-1 dhidi ya AL Ahly.