MSHAMBULIAJI wa JKT Tanzania, Paul Peter amesema anataka kuvunja rekodi binafsi alizonazo Ligi Kuu Bara kila nafasi atakayopewa.
Nyota huyo anayeongoza orodha ya wafungaji (kabla ya mechi za jana) sambamba na Saleh Karabaka anayecheza naye JKT na Peter Lwasa wa Pamba Jiji kila mmoja akifunga matatu, msimu uliopita akiwa Dodoma Jiji aliyoitumikia kwa miaka mitatu alifunga mabao manane. Kwa misimu yote akiwa Dodoma aliifunga mabao 12 ya Ligi Kuu.
Akizungumza na Mwanaspoti, mchezaji huyo wa zamani wa Azam na KMC alisema anachotamani kwa sasa ni kuhakikisha kwanza anaifikia rekodi ya msimu uliopita na kuivunja ili aweke mpya.
Alisema licha ya kwamba kikosi alichopo kwa sasa kina mastaa kibao katika nafasi anayocheza, lakini anaamini atapambana na kutumia vyema kila muda atakaopewa na kocha ili kutimiza lengo alilonalo msimu huu.
“Najua kwamba tupo wengi na wachezaji wote tunatamani kupata nafasi ya kucheza. Kwa upande wangu nitahakikisha sipotezi muda. Kocha wetu amenyooka sana akikupa maelekezo unatakiwa uyafanyie kazi ipasavyo, hivyo mpango wa kwanza ni kuwa mtii ili nipate matokeo mazuri,” alisema Paul na kuongeza:
“Sasa nataka kuhakikisha napata nafasi ya kucheza zaidi ili kukamilisha malengo, lakini namshukuru Mungu naona mwanga.”
Mbali na Peter pale JKT Tanzania eneo la ushambuliaji lina Valentino Mashaka, Edward Songo, Gamba Matiko, Said Luyaya na Saleh Karabaka.
Katika mechi saba ilizocheza kabla ya jana dhidi ya TRA United, maafande hao wa JKT walikuwa wameshinda mbili, sare nne na kupoteza mmoja ikiwa nafasi ya nne ya msimamo ma pointi 10.