IWAPO ulikuwa unadhani panga pangua ya ratiba ya Ligi Kuu Bara imemalizika baada ya wiki iliyopitwa kutangazwa mpya, basi pole yako, kwani Bodi ya Ligi (TPLB) imetangaza mabadiliko mengine kwa kuondoa mechi za Simba na Yanga.
Simba na Yanga zinazotarajiwa kuendelea na mechi za makundi ya Ligi ya Mabingwa Afrika zikiwa ugenini, zilipangwa kurejea katika Ligi Kuu wiki ijayo dhidi ya Tanzania Prisons na TRA United, lakini ghafla Bodi imeamua kuzipiga dochi mechi hizo za Desemba 2 na 3.
Bodi imesema tarehe mpya ya mechi hizo za viporo itapangwa upya na sababu ya kuahirishwa kwake imewekwa hadharani na Ofisa Habari wa TPLB, Karim Boimanda.
Yanga ilitakiwa kucheza ugenini dhidi ya Tanzania Prisons Desemba 2 na siku inayofuata Simba ingekuwa Tabora kula kiporo dhidi ya TRA United. Mechi hizo awali zilikuwa zipigwe mapema mwezi huu, lakini ziliahirishwa kutokana na sintofahamu iliyotokea kipindi cha Uchaguzi Mkuu uliofanyika Oktoba 29.
Akizungumza na Mwanaspoti, Boimanda alisema wameondoa michezo hiyo miwili ili kutoa nafasi kwa timu hizo katika mechi za kimataifa kwani zitakuwa zinatokea nje ya nchi.
“Kuondoa mechi hizo haina maana kuwa hawatakuwa na mechi. Tarehe hiyo watacheza kama kawaida ila watacheza wakiwa nyumbani. Kilichopo ni kwamba tutatafuta mechi ambazo wao ndio watakuwa wenyeji na tutaweka katika ratiba mpya na hizi mechi walizopaswa kucheza tutazipangia ratiba nyingine,” alisema.
“Timu hizo zipo ugenini zote kwa ajili ya mechi za kimataifa zina ratiba ngumu baada ya mechi hadi zinarudi Dar es Salaam kwa Yanga itakuwa na siku mbili hizo hazitoshi kuanza safari ya kuifuata Tanzania Prisons, vivyo hivyo kwa Simba ratiba yao kuifuata TRA itakuwa na siku moja hadi irudi ndio sababu ya kuhairisha hiyo michezo.”
Yanga inatarajiwa kushuka uwanjani kesho Ijumaa dhidi ya JS Kabylie ya Algeria ikiwa ni mechi ya pili ya Kundi B, huku SImba yenyewe itakuwa Bamako, Mali kuvaana na Stade Malien kwa mechi ya Kundi D.