Tanzania imeendelea kufanya utafiti wa kina wa jiofizikia kwa kutumia teknolojia ya ndege nyuki (drone) katika Kata ya Basotu, wilayani Hanang, mkoani Manyara ili kubaini maeneo yenye hifadhi madini kwa lengo ya kuyalinda yaweze kuongeza tija kwa manufaa ya wananchi.
Utafiti huo wa madini unaotekelezwa na kampuni ya SkyPM Solution ni sehemu ya utekelezaji wa agenda ya serikali ya kufikisha utafiti huo kwa angalau asilimia 50 ifikapo mwaka 2030 ili kuongeza nguvu ya kuzilinda rasilimali hizo muhimu.
Waziri wa Madini, Anthony Mavunde amekagua utafiti huo na kuridhishwa na Teknolojia inayotumika huku akisema kuwa “matokleo ya utafiti huo yanalenga kuwanufaisha wananchi wa Hanang na taifa kwa ujumla kupitia uwekezaji, ajira na mapato yatakayoongeza huduma msingi za jamii.
Naye Meneja wa kampuni ya SkyPM Solution, Paul Madata amesema matumizi ya teknolojia ya ndege nyuki yamerahisisha na kuongeza ufanisi wa utafiti wa awali, kwani inaweza kupima hadi zaidi ya kilomita tatu chini ya uso wa ardhi kwa muda mfupi.
Sekta ya madini ni miongoni mwa sekta zinazochangia kiwango kikubwa cha pato la taifa huku Afisa Madini Mkazi wa mkoa huo, Mhandisi Godfrey Nyanda akisema kuwa tayari wamekusanya zaidi ya asilimia 35.21 ya lengo la ukusanyaji wa Shilingi Bilioni 2.2 ya mwaka wa fedha 2025/26.
Matokeo ya utafiti huo yanatarajiwa kuisaidia serikali katika kuikuza sekta ya madini ili iweze kuongeza tija zaidi katika pato la taifa.
Imeandaliwa na @moseskwindi
