TIMU ya Taifa ya Tanzania ya Wanawake kwa mchezo wa Futsal, imeitandika New Zealand mabao 4-2 kwenye mechi ya kundi C ya kuwania ubingwa wa Kombe la Dunia.
Mechi hiyo ilipigwa mapema asubuhi katika Uwanja wa PhilSports Arena, Pasig nchini Ufilipino yanapofanyika mashindano hayo.
Hii ni mechi ya pili ya kundi baada ya awali Tanzania kupoteza kwa mabao 10-0 dhidi ya Ureno uwanjani hapo.
Tanzania ilikuwa ya kwanza kupata bao kupitia kwa Mary Siyame aliyeng’ara baada ya kufunga hat-trick dakika ya 11, 22 na 40 na moja likiwekwa kambani na Winifrida Charles dakika ya 27. Mabao mawili ya wapinzani yalifungwa na Hannah Kraakman dakika ya 18 na Jess Verdon dakika ya 27.
Baada ya kung’ara, Mary alinyakua tuzo ya mchezaji bora wa mechi na kuweka rekodi ya kuwa mchezaji wa pili kufunga hat-trick baada ya awali Sara Boutimah wa Italia kuweka kambani mabao matatu dhidi ya Panama, chama lake likiibuka na ushindi wa mabao 17-0.
Kwenye mechi hiyo, Tanzania ilicheza tofauti na mechi ya kwanza ikiingia kwa kuiheshimu New Zealand na kushambulia kwa kasi.
Timu hiyo ilionyesha kiwango bora ikicheza kwa kujiamini, nidhamu ya kuzuia kwa umakini na pasi za kuonana zilizozaa matunda ya mabao hayo.
Tanzania sasa inapaswa kupata ushindi mechi ya Novemba 29, 2025 dhidi ya Japana ili kujihakikishia nafasi ya kutinga robo fainali ya Kombe la Dunia.
Kocha Mkuu wa Tanzania, Curtis Reid, amesema alifanyia marekebisho makosa yaliyopita na kufanya mabadiliko kutokana na aina ya mpinzani waliokuwa wanakutana naye.
“Kwanza tulirekebisha makosa mechi iliyopita na nilifanya mabadiliko ya kiuchezaji, morali ya wachezaji ilikuwa kubwa walihitaji kushinda kwa sababu bado wana nafasi ya kufanya vizuri,” amesema Reid.
Nyota wa Tanzania, Siyame amesema: “Kwanza nashukuru kwa kufunga na kuisaidia timu hii sio yangu peke yangu tulipambana wote wachezaji, tuliwaheshimu wapinzani wetu ndio maana tumeshinda.”