Noni Madueke amefunga bao lake la kwanza akiwa na Arsenal tangu atue msimu huu akitokea Chelsea, huku Washika Bunduki hao wa London wakiendeleza rekodi yao ya ushindi asilimia 100 kwenye Ligi ya Mabingwa Ulaya msimu huu kwa kuichapa Bayern Munich mabao 3-1, mechi iliyochezwa usiku wa Novemba 26, 2025 kwenye Dimba la Emirates jijini London, England.
Arsenal ilitawala mechi hiyo kuanzia mwanzo na ilitangulia kufunga bao dakika ya 22 baada ya Jurrien Timber kuunganisha kwa kichwa kona ya Bukayo Saka.
Hilo ni bao la kumi Arsenal inafunguka kupitia mpira wa kona msimu huu, idadi kubwa zaidi kuliko timu nyingine yoyote katika ligi tano bora za Ulaya.
Bayern ilianza kuingia mchezoni baada ya kurudi nyuma na kusawazisha dakika 10 baadaye kupitia mpira mrefu wa Joshua Kimmich kwenda kwa Serge Gnabry, aliyewatumikia Arsenal hapo awali, ambaye alitoa pasi ya chini kwa Lennart Karl, kinda wa miaka 17, akafunga.
Hilo lilikuwa bao la kwanza Arsenal imeruhusu kwenye mashindano haya msimu huu, lakini haikuizuia kuendelea na rekodi nzuri ya ushindi.
Winga wa Uingereza, Madueke aliirejesha Arsenal mbele baada ya mchezaji wa akiba Riccardo Calafiori kupiga krosi kali kwenye eneo la hatari ambayo Madueke aliitumia vyema na kuifunga.
Arsenal ilijihakikishia ushindi kupitia kwa Eberechi Eze, shujaa wa mechi ya London Derby dhidi ya Tottenham, aliyepiga pasi ya juu ya mabeki wa Bayern na Gabriel Martinelli akaudhibiti mpira, akampita kipa Manuel Neuer aliyekuwa ametoka vibaya na kutupia wavuni, hivyo kuipa Bayern Munich kichapo cha kwanza msimu huu.
Ushindi huo ni wa tano mfululizo kwa Arsenal katika Ligi ya Mabingwa Ulaya msimu huu ikipaa kileleni mwa msimamo na pointi 15, ikiishusha Bayern ambayo awali zilikuwa zikitofautiana mabao ya kufunga na kufungwa.
Arsenal imebakiza mechi tatu kumaliza hatua hii ya awali kuwania kufuzu 16 bora ikihitaji pointi tano pekee kufuzu moja kwa moja hatua hiyo.
Mechi hizo itacheza dhidi ya Club Brugge itakayopigwa Desemba 10, 2025, kisha Januari 20, 2026 dhidi ya Inter Milan zote ugenini, itamalizia nyumbani Januari 28, 2026 dhidi ya Kairat.