Dar es Salaam. Mahakama Kuu Divisheni ya Ardhi, imepanga Desemba 16, 2025 kutoa hukumu katika kesi ya ardhi iliyofunguliwa na mtoto wa Askofu John Sepeku, Bernardo Sepeku.
Kesi hiyo ya ardhi namba 378/2023, imefunguliwa na Bernado Sepeku dhidi ya Bodi ya Wadhamini wa Kanisa la Anglikana Tanzania, Askofu wa Dayosisi ya Dar es Salaam, Jackson Sosthenes na kampuni ya Xinrong Plastic Waste Industry Co Ltd.
Bernado ambaye ni msimamizi wa mirathi ya baba yake anapinga uamuzi wa Dayosisi hiyo chini ya uongozi wa Askofu Sosthenes wa kuwanyang’anya zawadi ya shamba hilo alilopewa baba yao na kumgawia mwekezaji, kampuni ya Xinrong.
Awali, shauri hilo lilipangwa kutolewa hukumu leo Alhamisi Novemba 27, 2025 mbele ye Jaji Arafa Msafiri.
Hata hivyo, Naibu Msajili wa Mahakama hiyo Sara Buya amesema kuwa Jaji Msafiri alimwambia bado hajamaliza kuandika hukumu hiyo, hivyo alimuelekeza aahirishe hadi Desemba 16, 2025.
” Hukumu yenu bado haijawa tayari, Jaji Msafiri amenielekeza niiahirishe kesi hii hadi Desemba 16, 2025 saa 4:00 asubuhi, ambapo atawasomea hukumu,” amesema Buya na kisha kuiahirisha kesi hiyo.
Awali, wakili wa mdai, Eric Amon aliieleza mahakama hiyo kuwa kesi hiyo imeitwa kwa ajili ya hukumu na wao wapo tayari.
Hata hivyo, wakili wa wadaiwa katika kesi hiyo, Dennis Malamba hakuwepo mahakamani hapo wala mwakilishi wake.
Kesi hiyo inatarajiwa kutolewa hukumu siku hiyo, baada ya upande wa mdai na mdaiwa kufunga ushahidi wao, Oktoba 15, 2025.
Upande wa walikuwa na mashahidi tisa na upande wa mdaiwa walikuwa na mashahidi watano.
Katika kesi hiyo, pamoja na mambo mengine, Bernado anaiomba Mahakama iamuru alipwe fidia ya Sh3.72 bilioni anayodai ndio thamani ya shamba hilo kwa sasa.
Pia, anadai alipwe Sh493.65 milioni kama fidia ya hasara ya mazao yaliyoharibiwa katika shamba hilo.
Bernado alifungua kesi hiyo mwaka 2023 baada ya kubaini kuwa uongozi wa sasa wa Dayosisi hiyo chini ya Askofu wake, Sosthenes uliligawa shamba hilo ambalo kwa sasa linadaiwa kuwa na thamani ya Sh3.7 bilioni kwa mwekezaji, kampuni ya Xinrong Plastic Waste Industry Co Ltd.
Mwekezaji huyo baada ya kugawiwa shamba hilo ambalo walikuwa wamejenga nyumba mbili, alifyeka mazao mbalimbali waliyokuwa wamelimwa, kisha akajenga kiwanda na nyumba yenye thamani ya Sh165 milioni.
Kwa mujibu wa ushahidi wa upande wa mlalamikaji uliotolewa na mashahidi mbalimbali wakiwemo wajumbe wa Bodi ya Wadhamini na maaskofu wengine wa kanisa hilo, Askofu Sepeku alipewa zaidi hiyo na Dayosisi ya Dar es Salaam mwaka 1980.
Kwa mujibu wa kumbukumbu za kesi hiyo zilizoko mahakamani, Desemba 8, 1978, Kamati ya Kudumu ya Kanisa hilo Dayosisi ya Dar es Salaam katika kikao chake ilipendekeza kumpatia Askofu Sepeku zawadi ya ardhi eka 20 na nyumba, katika kutambua utumishi wake.
Sinodi ya Dayosisi hiyo katika kikao chake cha Machi 8 na Machi 9 ,1980 iliridhia pendekezo hilo na iliazimia na kumpatia Askofu Sepeku, shamba la eka 20 lililoko Buza Wilayani Temeke, na nyumba eneo la Kichwere, Buguruni, wilayani Ilala, Dar es Salaam.
Askofu Sosthenes ambaye ni shahidi wa tano wa utetezi, katika ushahidi wake wa maandishi aliyowasilisha mahakamani hapo pamoja na mambo mengine alidai kuwa waliompa Askofu Sepeku zawadi hizo hawakuwa na mamlaka kufanya hivyo.
Sosthenes alisisitiza hayo hata wakati akihojiwa maswali ya dodoso na jopo la mawakili wa mdai, Deogratius Butawantemi, kutoka kampuni ya uwakili ya Diakonus Attorneys, Gwamaka Sekela na Eric Amon.