KOCHA Mkuu wa Azam FC, Florent Ibenge, amesema wakati wanakutana na Wydad Athletic kesho Ijuma Novemba 28, 2025, matokeo pekee wanayoyataka ni kushinda au sare, lakini sio kupoteza.
Kauli hiyo inaonyesha namna ambavyo Ibenge hataki kuingia kinyonge kukabiliana na Wamorocco hao walioanza hatua ya makundi Kombe la Shirikisho Afrika msimu huu kwa ushindi wa mabao 3-0 dhidi ya Nairobi United, wakati Azam ikifungwa 2-0 na AS Maniema Union.
Ibenge amesema licha ya kwamba kikosi chake kimetoka kupoteza mechi ya kwanza ugenini, wameshayaweka nyuma matokeo hayo na kesho wataingia na mpango mwingine.
Mkongomani huyo ameongeza kuwa, watakutana na timu yenye wachezaji wazuri lakini amewataka wachezaji kuandika historia mpya.
“Kwanza tulikuwa na malengo ya kufuzu makundi, hilo tumelikamilisha, sasa tupo kwenye hatua hii ambayo tunataka kuandika historia mpya ya klabu yetu.
“Tumetoka ugenini kwenye mchezo wa kwanza tukapoteza mbele ya Maniema, tumejifunza na tuna akili mpya wakati tunakwenda kukutana na Wydad Athletic.
“Hii ni timu nzuri, ina wachezaji bora na kocha mzuri, lakini tunataka kushinda kesho, kama sio kushinda tupate sare, lakini hatutaki kupoteza, nimewaambia wachezaji wangu kwamba wana nafasi ya kuandika historia mpya kuanzia mchezo wa kesho,” amesema.
Kesho Ijumaa, Azam itakutana na Wydad ikiwa ni mechi ya Kundi B katika Kombe la Shirikisho Afrika, itakayopigwa Uwanja wa New Amaan Complex, Zanzibar.