Mwendo mbaya wa Liverpool msimu huu umeendelea baada ya  kupokea kipigo cha aibu kutoka kwa PSV Eindhoven kwenye Uwanja wa Anfield, katika mechi ya Ligi ya Mabingwa Ulaya iliyochezwa usiku wa Novemba 26, 2025.

Vijana wa Arne Slot sasa wamepoteza mechi tisa kati ya 12 ilizocheza kwenye mashindano yote msimu huu, hali inayoashiria mporomoko mkubwa wa kiwango. PSV ilitawala mechi hiyo na kuwaacha wenyeji wakiwa na maswali mengi ya kujibu.

Licha ya kutokuwa na matokeo mazuri ligi ya ndani ambapo ilikuwa imepoteza mechi mbili zilizopita kwa tofauti ya mabao matatu, PSV ilikuja na hali ya kujiamini baada ya ushindi mkubwa dhidi ya Real Madrid katika mechi ya awali ya Ligi ya Mabingwa.

Hata hivyo, kipigo hiki kimeweka shinikizo kubwa kwa kocha Slot, ambaye anakabiliwa na changamoto ya kurekebisha hali ya timu hiyo inayozidi kuyumba, huku kibarua chake kikiwa hatarini.

PSV ilitangulia mapema dakika ya sita, baada ya Virgil van Dijk kushika mpira, akidhani amechezewa faulo. Ivan Perisic alitumia nafasi hiyo kufunga bao la penalti kwa utulivu.

Liverpool ilisawazisha dakika 10 baadaye kupitia Dominic Szoboszlai, ambaye alitupia wavuni mpira uliookolewa na kipa Matej Kovár kufuatia shuti la Cody Gakpo.

Wakiwa na kiu ya ushindi, Liverpool ilionekana kuimarika huku Gakpo akikosa kwa karibu na kichwa cha Van Dijk kikigonga mwamba.

Hata hivyo, PSV ilirejea mbele kupitia pasi murua ya Mauro Junior iliyomfikia Guus Til, ambaye alifunga baada ya Milos Kerkez kushindwa kuzuia.

Mambo yalizidi kuwa mabaya kwa Liverpool iliporuhusu bao la tatu, wakati Couhaib Driouech alipofunga kutoka kwenye mpira wa kurudi wa Ricardo Pepi.

Mshambuliaji huyo kutoka Morocco, alihitimisha karamu ya mabao kwa kufunga la nne katika muda wa nyongeza, akipiga shuti chini kona ya kulia, na kuipa PSV ushindi wa kwanza dhidi ya timu ya England tangu ilipoifunga Tottenham mwaka 2008 kwenye Europa League.

Liverpool sasa imeshuka hadi nafasi ya 13 na italazimika kubadilika haraka iwapo inataka kumaliza katika nafasi nane za juu.

Leave a Reply

Your email address will not be published. Required fields are marked *