Dar es Salaam. Waziri wa Uchukuzi, Profesa Makame Mbarawa amesema kukamilika kwa mradi wa ujenzi wa matanki 15 ya kuhifadhia mafuta kutapunguza siku za meli zinazoleta nishati hiyo nchini kukaa nangani.
Profesa Mbarawa amesema kwa sasa meli hizo zinakaa siku 22 nangani pia siku saba za kushusha mafuta hali inayoongeza gharama.
Waziri huyo ameeleza hayo leo Alhamisi, Novemba 27, 2025 baada ya kufanya ziara kwenye ujenzi wa mradi mkubwa wa matenki ya kuhifadhi na kusambaza mafuta uliopo Kigamboni, Dar es Salaam ambao kwa sasa umefikia asilimia 33.5.
Mradi huo ulioanza Agosti 2024 umegharimu pesa za ndani Sh703 bilioni unatarajiwa kukamilika Agosti 2026 ambapo utahifadhi mafuta ya ndege, petroli na dizeli unasimamiwa na Mamlaka ya Usimamizi wa Bandari Tanzania (TPA).
“Meli ikileta mafuta inakaa siku 22 nangani halafu inakuwa na siku saba za kutelemsha mafuta jumla 29. Kila siku meli ikikaa nangani mwenye mafuta anachaji kiasi cha Sh57 milioni sasa ukipiga hesabu kwa siku hizo zaidi ya 20 ni mamilioni ya shilingi.
“Ni karibu milioni 500 kwa meli moja na anayelipa gharama hizi hazibaki kwa anayeleta mafuta zinakwenda kwa mtumiaji mimi na wewe, kwenye usafiri, chakula, uzalishaji kutokana na kupanda kwa bei ya mafuta kunaongeza na gharama za uzalishaji,” amebainisha.
Kadhalika matenki hayo yataihakikishia nchi usalama na hifadhi ya mafuta hata pale ikitokea yakateteleka katika soko la dunia.
Matenki sita yatahifadhi mafuta ya dizeli, matano petroli, matatu mafuta ya ndege na tenki moja litakalotumika kama njia.
Akieleza zaidi waziri huyo amesema nchi ikiwa na hifadhi kubwa inakuwa na uhakika wa kuwa nayo hata ikitokea bei ikiyumba sokoni hivyo nchi haitoathirika.
Akitaja faida za mradi huo, Profesa Mbarawa amesema ukikamilika meli itaanza kukaa nangani siku tano hadi sita kutoka siku 22 za sasa.
Amesema meli zitaanza kushusha mafuta kwa siku mbili hadi nne kutoka siku saba za sasa huku ikitegemea ukubwa wa meli.
“Tutasimamia mradi huu ujengwe kwa viwango na mkandarasi kama ilivyo kwenye mkataba na mwakani Agosti, mradi utakamilika kwa asilimia 100,” amebainisha huku akisema yatakuwa ni matenki makubwa nchini.
Naibu Mkurugenzi Mkuu wa Mamlaka ya Usimamizi wa Bandari Tanzania, Dk Baraka Mdima amesema asilimia 33.5 ni ujumla wa maendeleo ya mradi huku sehemu kubwa ikihusisha maandalizi ya awali.
Amesema maandalizi ya awali tayari na sasa mradi unaendelea huku akisema wanaendelea sehemu iliyobakia.
Akielezea katika mtazamo wa uchumi, Mchumi kutoka Chuo Kikuu cha Dodoma (UDOM), Dk Mwinuka Lutengano amesema lazima kuwe na mfumo wa kuhifadhi mafuta kwa wingi kwanza kuna faida ikiwemo kuwa na bei moja ya mafuta ya muda mrefu.
“Uhifadhi una maana kubwa hasa ukipata mafuta ya bei ya chini katika soko la dunia kwa maana utachukua mengi na utakaa nayo muda mrefu,” amesema Dk huyo.
Amesema jambo la muhimu ni kuwa na mafuta kwa wingi ili yatumike kwa muda mrefu suala litakalosaidia uchumi wa nchi kwa ujumla.