Dodoma. Bakari Kabuga, baba mzazi wa mwanafunzi wa Chuo Kikuu cha Dodoma (UDOM), Said Kabuga aliyefariki dunia baada ya kutumbukia katika kisima cha maji eneo chuo, ameeleza kile anachoamini kimesababisha kifo cha mtoto wake na siyo michezo ya kubeti kama ilivyoelezwa awali.
Said Kabuga, mwanafunzi wa mwaka wa pili chuoni hapo alifariki dunia usiku wa kuamkia Novemba 26, 2025 baada ya kutumbukia kwenye kisima, na taarifa kutoka kwa wanafunzi waliokuwa karibu naye zilieleza alionekana mwenye mawazo na kauli zilieleza kuwa alikuwa ametumia fedha za ada kwenye michezo ya kubahatisha.
Leo Alhamisi Novemba 27, 2025, baba wa mwanafunzi huyo amesema hakuna ukweli kuwa kijana wake huyo alikuwa ametumia fedha kwenye michezo ya kubahatisha, kwani si tabia yake na hajawahi kujiingiza kwenye michezo hiyo.
Kabuga amesema anachokiamini ni kuwa kijana wake kweli huenda alikuwa na hofu, lakini iliyotokana na kushindwa kufaulu moja ya masomo yake alipokuwa muhula wa kwanza kwenye masomo yake.
Baba huyo amesema katika kipindi cha likizo kijana huyo alirudi nyumbani na kumweleza kuwa alikuwa amekosa alama za kutosha katika moja ya masomo yake chuoni hapo, hivyo akaonesha wasiwasi mkubwa hata alipokuwa akirudi chuoni.
“Aliporudi, kama kawaida yake, alikuwa ni mtu wa kushinda nyumbani na kufanya kazi za kutusaidia sisi wazazi wake, na akimaliza wakati wote anakwenda kucheza mpira, lakini hakuwahi kuonekana katika makundi mengine ya vijana,” amesema Kabuga.
Ameeleza kuwa wakati ulipofika aliwaaga wazazi wake kuwa anakwenda chuoni, ndipo alimuandalia nauli na fedha kidogo ambayo haikuzidi Sh500,000, na aliondoka nyumbani kwao Kijiji cha Igagala namba 12 Wilaya ya Kariua Jumatatu ya Novemba 24, 2025.
Akijibu kuhusu somo ambalo kijana wake hakufaulu amesema: “Kwanza mimi sijui masuala ya masomo hayo ya chuo, aliposema hakufaulu nilitafuta sababu sikuzijua, nikamtaka aniambie kwa mapana lakini hatukuelewana.”
Kuhusu ada za shule, amekanusha kumpatia kiasi chochote cha fedha kwa ajili ya ada kwa kile alichoeleza kuwa mtoto wake alikuwa akisoma kwa mkopo wa Serikali.
Hata hivyo amesema kwa upole wa kijana wake hakutegemea kama angefikia hatua aliyochukua.
Kwa mujibu wa mzazi huyo, Said alikuwa mtoto wake wa kwanza kati ya watoto watatu alionao, na alikuwa tegemeo, mfano wa maisha kwa wadogo zake kutokana na mwenendo wake.
“Kinachoniuma ni kwamba kesho pale kijijini Igagala tunakuwa na msiba, na ni msiba wa Said, tunakuwa na mazishi tena ya mwanangu ambaye juzi tu alituaga anakuja kusoma, lakini ndiyo hivyo tena…,” amezungumza huku akifuta machozi.
Rafiki wa karibu na kijana huyo, Samuel Kayombo, ambaye ndiye alitoa taarifa za kifo cha Said kwa wazazi, amesema kuwa taarifa za kucheza michezo ya kubahatisha hata yeye alizisikia kutoka kwa baadhi ya wanafunzi, lakini haamini kama ilikuwa ni chanzo cha kifo.
Kayombo amesema wakati walipoondoka kwenda likizo, rafiki yake huyo waliyekuwa wakisoma kozi tofauti alimshirikisha kuhusu kufeli mojawapo ya somo, ndipo akamshauri awasiliane na mwalimu wake ili wajue cha kufanya.
“Sababu za kufeli somo hilo najua, Said aliondoka chuoni akafuata cheti chake cha JKT Tanga. Aliporudi alikuta wenzake wamefanya mitihani. Nilizungumza naye akanielewa, lakini alipokwenda kwa wazazi naamini hawakupokea kwa mema, na nilivyokuwa naye jamaa alikuwa mkimya, huenda ilimuumiza,” amesema Kayombo.
Kwa mujibu wa Kayombo, baada ya hapo Said alionekana muda wote kuwa na msongo wa mawazo, hata ikasababisha muhula wa pili asimalize vema, kwani kuna somo pia alishindwa kufikia alama zilizotakiwa, ndipo akawa mtu aliyependa kujitenga.
Meneja Mahusiano wa DOM, Rose Mdame, amesema taarifa za kushindwa kufikia alama zilizotakiwa hata kupeleka kufeli mojawapo ya somo ndiyo amezisikia, hivyo akaomba kufuatilia zaidi.
Hata hivyo, Rose amesema mambo yatazungumzwa na Polisi watakapokamilisha uchunguzi, hivyo kwa sasa chuo hakiwezi kuzungumza.
Kamanda wa Polisi Mkoa wa Dodoma, Gallus Hyera, amesema mpaka sasa Polisi hawawezi kusema kuwa kifo hicho kilitokana na kitu gani, kwani bado wanafanya uchunguzi