Dar es Salaam. Mahakamani ya Hakimu Mkazi Kisutu imepanga Desemba 3 na 4, 2025 kwa ajili ya Jamhuri kuwasomema maelezo ya mashahidi 55 na vielelezo 54, wafanyabiashara sita wakiwamo wamiliki wa jengo lililoporomoka Mtaa wa Mchikichi na Congo, wanaokabiliwa na kesi ya kuua bila kukusudia.
Hatua hiyo inatokana na upelelezi wa kesi hiyo ya kuua bila kukusudia, kukamilika na upande wa mashtaka kusajili nyaraka na taarifa muhimu Mahakama Kuu.
Hata hivyo, Jamhuri imedai kuwa inatarajia kuwasomewa washtakiwa hao maelezo ya mashahidi 55 na vielelezo 54 kisha kesi hiyo kuhamishiwa Mahakama Kuu wa ajili ya usikilizwaji.
Washtakiwa katika kesi hiyo ambao ni wakazi wa Jiji la Dar es Salaam ni Leondela Mdete (49), mkazi wa Mbezi Beach, Zenabu Islam (61), mkazi wa Kariakoo na Ashour Awadh Ashour (38), mkazi wa Ilala.
Wengine ni Soster Nziku (55), mkazi wa Mbezi Beach, Aloyce Sangawe (59), mkazi wa Sinza na Stephen Nziku (28), mkazi wa Mbezi Beach.
Hayo yameelezwa leo, Alhamisi Novemba 27, 2025 na Wakili wa Serikali Mwandamizi, Clemence Kato katika Mahakama hiyo, mbele ya Hakimu Mkazi Mwandamizi, Geofrey Mhini anayesikiliza kesi hiyo.
Kato amedai kuwa, upelelezi wa kesi hiyo umekamilika na tayari wamesajili nyaraka muhimu kuhusu kesi hiyo Mahakama Kuu.
“Mheshimiwa hakimu, upelelezi umekamilika, tumesajili taarifa muhimu Mahakama Kuu, hivyo tunasubiri mwongozo wako kwenye jambo hili,” amedai Wakili Kato.
Kato baada ya kutoa taarifa hiyo, Hakimu Mhini amesema kwa kuwa idadi ya mashahidi ni wengi, inabidi kesi hiyo ipangiwe siku mbili za kusikilizwa.
“Nimeangalia kwenye mtandao wa Mahakama, mashahidi wapo 55 na vielelezo 54, na muda huu wa mchana hatuwezi kuwasoma wote tukamaliza, hivyo inabidi nipange siku mbili mfululizo ili wasomewe mashahidi na vielelezo hivyo,” amesema Hakimu Mhini na kuahirisha kesi hiyo hadi Desemba 3 na 4, 2025 washtakiwa watakaposomewa maelezo hayo.
Kwa mara ya kwanza, washtakiwa hao walifikishwa mahakamani hapo Novemba 29, 2024 na kusomewa mashtaka 31 ya kuua bila kukusudia katika kesi ya mauaji namba 33633/2024 iliyopo Mahakama hapo.
Washtakiwa wanadaiwa kutenda makosa yao kinyume na kifungu 195 na 198 cha Kanuni ya Adhabu, Sura ya 16 iliyofanyiwa marejeo mwaka 2022.
Kwa pamoja wanadaiwa Novemba 16, 2024 katika Mtaa wa Mchikichi na Congo, eneo la Kariakoo, isivyo halali walishindwa kutimiza majukumu yao na kusababisha vifo vya watu 31.