Simanjiro. Waziri wa Madini, Anthony Mavunde, amekabidhi leseni kwa vikundi 21 vyenye wanachama 423 Wilaya ya Simanjiro, mkoani Manyara, ikiwa ni hatua ya kuwawezesha vijana na wanawake walioko kwenye uchimbaji mdogo wa madini.
Mavunde amekabidhi leseni hizo leo, Alhamisi Novemba 27, 2025, katika mji mdogo wa Mirerani wakati wa mkutano wake na wadau wa madini ya Tanzanite.
Amesema kati ya vikundi hivyo, saba vyenye wanachama 127 vimepata leseni za uchimbaji mdogo wa madini ya Tanzanite, huku vikundi 14 vyenye wanachama 296 vikikabidhiwa leseni ndogo za biashara ya madini hayo.
“Mpango huu una lengo la kuwajengea uwezo vijana na wanawake kupitia mradi wa MBT (Mining for a Brighter Tomorrow) ambapo watamiliki maeneo hayo kwa mujibu wa sheria ili kufikia matokeo tarajiwa,” amesema Waziri Mavunde.
MBT ni mpango wa kitaifa uliopo kati ya 2025–2030 uliowekwa na Wizara ya Madini ili kuimarisha ushiriki wa vijana, wanawake na watu wenye ulemavu katika sekta ya madini.
Lengo kuu ni kuwapa makundi haya fursa sawa ya kushiriki uchimbaji, usindikaji na biashara ya madini siyo tu kama wafanyakazi, bali pia wajasiriamali au wawekezaji wadogo.
Mavunde, akihutubia mkutano huo, amewataka vijana kote nchini kuilinda amani ya Tanzania, akisisitiza kuwa nchi hii si mali ya mtu mmoja.
Amesema vijana wanapaswa kuwa mstari wa mbele kuitetea na kuihifadhi amani kwa wivu mkubwa.
“Lindeni hiki ambacho Mungu amewapatia kwa masilahi mapana ya wananchi wa Tanzania, kwani bila amani hata madini hayawezi kuchimbwa,” amesema Mavunde.
Mwenyekiti wa Chama cha Wanunuzi wa Madini Tanzania (Tamida), Leopard Kimaro, ameomba Serikali kushughulikia changamoto zilizojitokeza katika jengo jipya la Soko la Madini ya Vito Mirerani ili kuboresha mazingira ya biashara.
Aidha, mmoja wa walionufaika na leseni hizo, Regan Henry, ameishukuru Serikali kwa kuwakabidhi vibali hivyo, akisema watazitumia kikamilifu kwa kufuata malengo na masharti yaliyowekwa.