Kylian Mbappe amefunga mabao manne na kuiwezesha Real Madrid kushinda dhidi ya Olympiacos katika Ligi ya Mabingwa, mechi ikichezwa Stadio Georgios Karaiskáki nchini Ugiriki, usiku wa Novemba 26, 2025.
Wenyeji Olympiacos walipata bao la kushtukiza mapema kupitia kombora la yadi 20 kutoka kwa Francisco Chiquinho.
Hata hivyo, Mbappe aliibuka shujaa wa Real Madrid kwa kufunga mabao matatu ndani ya dakika saba, ikiwa ni hat-trick ya pili kwa kasi zaidi katika historia ya Ligi ya Mabingwa.
Bao lake la kwanza lilikuja baada ya kukimbia vizuri kwenye pasi ya Vinicius Jr na kumalizia kwa utulivu. Kisha akaongeza la pili kwa kichwa baada ya kupokea krosi ya Arda Guler.
Mbappe aliendelea kuwa hatari na kufunga la tatu kwa kumalizia pasi ya Eduardo Camavinga, akivunja mtego wa kuotea.
Aliandaa pia bao lililofungwa na Vinicius, lakini likakataliwa kwa sababu ya kuotea kwake mwenyewe.
Aurelien Tchouameni alikaribia kuongeza bao la nne lakini mpira wake uligonga mwamba huku Real Madrid ikiendelea kutawala licha ya kukosa mabeki watano na kipa wa kwanza kutokana na majeraha na maradhi.
Hata hivyo, Olympiacos ilipata tumaini ilipopata bao kupitia kichwa kikali cha Mehdi Taremi aliyeingia kipindi cha pili.
Mbappe aliongeza bao lake la nne kwa kumalizia pasi ya karibu kutoka kwa Vinicius Jr.
Lakini Ayoub El Kaabi aliwapa Olympiacos matumaini ya mwisho kwa kufunga kwa kichwa tena, japokuwa lilikuwa ni faraja ya muda tu.
Ushindi huu umevunja rekodi ya mechi tatu mfululizo bila ushindi kwa Real Madrid katika mashindano yote, na kuwa ushindi wa kwanza wa ushindani mjini Athens katika ziara yao ya kumi.
Real Madrid sasa inashika nafasi ya tano kwa alama 12, ikiwa nyuma ya vinara Arsenal kwa pointi tatu, huku Olympiacos ikiwa nafasi ya 33 na pointi mbili.
MATOKEO YA MECHI ZINGINE NOVEMBA 26, 2025
Sporting Lisbon 3-0 Club Brugge
Eintracht Frankfurt 0-3 Atalanta
Atletico Madrid 2-1 Inter Milan
PSG 5-3 Tottenham