MGOMBEA wa nafasi ya Mwenyekiti wa Bodi ya Ligi (TPLB), Hosea Lugano amejiuzulu nafasi zote alizokuwa anazishikilia TFF.
Hosea amefanya uamuzi huo muda mchache baada ya Kamati ya Uchaguzi ya TFF, kumuandikia barua ya kujiuzulu nafasi zake zote alizonazo ili kuepusha mgongano wa maslahi.
“Leo nimepokea barua kutoka Kamati ya TFF ambayo jana walikaa kikao kilikuwa cha majadiliano walipitia mchakato wa uchaguzi katika huo mchakato waliona kuna mambo yanaleta mwingiliano wa maslahi,” alisema Lugano na kuongeza;
“Nafasi ya Kamati ya Utendaji ya TFF Mwenyekiti wa mashindano, Mjumbe wa Kamati ya Uendeshaji na Usimamizi wa Lgi, hivyo kamati imetoa sababu hiyo na kunitaka nijiuzulu ili kupisha muingiliano.”
Lugano amesema, kutokana na muda kuwa mfupi na uchaguzi kutarajiwa kufanyika keshokutwa Jumamosi, hajapata muda wa kutafakali hayo kisheria lakini kwa lengo la kutii maagizo ya kamati ameamua kuachia ngazi.
“Nafasi ya Ujumbe wa Kamati ya Utendaji ni nafasi ya kuchaguliwa nimepitishwa na wajumbe wa mkutano mkuu wa TFF waliniamini na kunipa nafasi natumia kuwafikishia ujumbe walionichagua kuwa, nimelazimika kubaliana na hilo, ili niweze kuendana na mchakato wa uchaguzi.”
Uchaguzi wa Bodi unafanyika keshokutwa na Lugano atachuana na Idrissa Nassor ‘Father’ anayekaimu kwa sasa nafasi ya uenyekiti iliyoachwa wazi na Steven Mnguto aliyejiuzulu Juni mwaka huu.