Dar es Salaam. Katika kuadhimisha historia na urithi wa ushirikiano kati ya Tanzania, China na Zambia, nchi hizo zimezindua mchoro maalumu wa reli ya Tazara.
Mchoro huo, uliotengenezwa na wachoraji wa Makumbusho ya Taifa ya Tanzania na China, umezinduliwa jana Jumatano, Novemba 26, 2025, ukiwa na viongozi wa ngazi mbalimbali kutoka Serikali za mataifa hayo.
Mchoro huo umebuniwa kuenzi mafanikio ya mradi mkubwa wa miundombinu uliozinduliwa kwa msaada wa China.
Hafla hiyo ilifanyika katika Makumbusho ya Taifa jijini Dar es Salaam, huku Waziri wa Maliasili na Utalii, Dk Ashatu Kijaji, akisisitiza kuwa uzinduzi huo ni sehemu ya kuendeleza urithi ulioasisiwa na waasisi wa mataifa hayo.
Waziri wa Maliasili na Utalii nchini, Ashatu Kijaji akizungumza katika hafla ya uzinduzi wa mchoro maalum wa urithi wa reli ya Tazara katika Makumbusho ya Taifa jijini Dar es Salaam jana Jumatano, Novemba 26, 2025.
Dk Kijaji amesema kuwa reli ya Tazara ni ishara ya maono ya waasisi wa mataifa hayo, waliotumia muda na nguvu kuhakikisha mradi unafanikishwa na kuchangia maendeleo ya kiuchumi na kijamii kwa wananchi wao.
Aidha, amesisitiza kuwa mchoro huo unaongeza chachu na ni ishara ya ushirikiano thabiti kati ya Tanzania na China kupitia mradi mkubwa zaidi uliofanywa na China barani Afrika.
“Kupitia reli ya Tazara, biashara kati ya Tanzania na Zambia imeimarika kwa kiwango kikubwa, ikirahisisha usafirishaji wa mazao, bidhaa na malighafi zinazochochea uchumi wa kikanda.
“Pia, Tazara imekuwa chachu ya ajira na fursa za kiuchumi kwa wananchi wanaoishi kandokando ya reli, ikiwapa uwezo wa kufikia huduma muhimu,” amesema.
Amesema reli ya Tazara imeleta mapinduzi katika kilimo kwa kuongeza thamani ya mazao ya wakulima, kuboresha upatikanaji wa bidhaa na kupunguza gharama za usafirishaji, hatua iliyoongeza kipato kwa maelfu ya familia.
Balozi wa China nchini Tanzania, Chen Mingjian, amesisitiza kuwa mchoro huo ni sehemu ya kuenzi urafiki wa zaidi ya miaka 50 kati ya mataifa hayo.
Balozi wa China nchini Tanzania, Chen Mingjian akizungumza katika hafla ya uzinduzi wa mchoro maalum wa urithi wa reli ya Tazara katika Makumbusho ya Taifa jijini Dar es Salaam, jana Jumatano Novemba 26, 2025.
“Leo tunayo furaha kukutana hapa katika ajenda ya bega kwa bega yenye lengo la kuenzi historia ya ujenzi wa reli ya Tazara, natoa shukurani kwa waasisi wa urafiki kati ya Tanzania na China,” amesema.
Balozi Chen amebainisha kuwa reli ya Tazara, iliyojengwa kwa msaada wa Serikali ya Jamhuri ya Watu wa China, imeendelea kuwa nyenzo muhimu ya kiuchumi tangu mataifa hayo yapate uhuru na kuanzisha urafiki wao.
“Ujenzi wa Tazara ni matokeo ya ushirikiano wa kweli uliowekwa na viongozi wetu, na imeendelea kudhihirisha mafanikio yake katika kuunganisha mataifa na kukuza maendeleo endelevu.
“China imeendelea kushiriki katika kutoa msaada wa kiufundi na maboresho ya uendeshaji, ili kuhakikisha reli hii inaendelea kuwa ya kisasa na yenye tija kwa kizazi cha sasa na kijacho,” amesema Balozi Chen.
Historia ya Tazara
Reli ya Tazara inabaki mojawapo ya miradi mikubwa zaidi ya ushirikiano wa kidiplomasia barani Afrika.
Upimaji wa ujenzi ulianza 1968, ujenzi rasmi 1970, majaribio 1975, na huduma rasmi kuanza mwaka 1976. Hatua hizi zote ziliongozwa na viongozi wa enzi hiyo, wakiwemo Mwalimu Nyerere wa Tanzania na Mao Zedong wa China, kwa lengo la kuunganisha uchumi wa mataifa ya Afrika yaliyojipatia uhuru na kuimarisha ushirikiano wa kikanda.
Reli yenye urefu wa kilomita 1,860 kutoka Dar es Salaam hadi Kapiri Mposhi nchini Zambia ni alama ya mshikamano wa kisiasa, kiuchumi na kijamii.
Ujenzi wake ulihusisha zaidi ya wataalamu, wahandisi na wafanyakazi 50,000 wa China, baadhi wakipoteza maisha kuhakikisha mradi unafanikiwa.
Ushirikiano huu uliweka msingi imara wa diplomasia ya maendeleo na uhusiano wa kimataifa ambao umeendelea kuimarishwa hadi leo.
Tazara si mradi wa kihistoria tu, bali pia umeleta mageuzi makubwa ya kijamii na kiuchumi kwa wakazi wa maeneo yanayopitiwa.
Leo, inabaki kuwa urithi wa kihistoria na ishara ya ushirikiano wa kimataifa unaounganisha historia na mustakabali wa maendeleo ya Tanzania, China na Zambia.