Dar es Salaam. Mtandao wa WhatsApp umetangaza kuja na kipengele kipya cha kutumia zaidi ya akaunti moja kwenye aplikesheni hiyo ikiwa ni sehemu ya masasisho (updates) kuboresha mawasiliano.
WhatsApp yenye watumiaji zaidi ya bilioni tatu katika zaidi ya nchi 180 duniani inatoa huduma ya kutuma ujumbe na kupiga simu rahisi, salama kote ulimwenguni.
Mtandao huo umeanza kuruhusu matumizi ya akaunti mbili kwenye simu moja kwa baadhi ya watumiaji, kwanza ikiwa ni sehemu ya awali ya majaribio ambapo imeanza kusambaza rasmi kipengele hicho kutumia akaunti mbili ndani ya programu moja.
Tovuti na mitazamo ya kiteknolojia imeeleza hatua hii inalenga kurahisisha utenganishaji wa mawasiliano ya kazi na ya binafsi bila hitaji la simu ya ziada.
Kwa mujibu wa taarifa iliyotolewa na kampuni hiyo, kipengele hicho kinapatikana kupitia toleo la majaribio (beta) la WhatsApp kwa iOS, toleo namba 25.34.10.72. Watumiaji walio katika mpango wa beta ndio wa kwanza kupata huduma hiyo.
Akaunti zinafanya kazi tofauti
Kila akaunti itafanya kazi kivyake, ikiwa na historia ya mazungumzo, backup, mipangilio ya faragha, na arifa (notifications) zake. Hii inawezesha watumiaji kutofautisha ujumbe wa kazi na maisha ya kawaida bila mkanganyiko.
Arifa zinapoingia, WhatsApp hutaja ni akaunti gani iliyopokea ujumbe huo, jambo linalosaidia mtumiaji kujua anashughulikia mazungumzo ya akaunti ipi.
Namna ya kuongeza akaunti
Fungua WhatsApp nenda kwenye sehemu ya settings, kisha utaona sehemu ya ‘add account’. Gusa alama iliyo karibu na jina lako kisha chagua add account, kubali masharti ya matumizi, weka namba yako ya pili ya simu, thibitisha kwa msimbo wa SMS kisha jaza jina na picha ya profaili (hiari).
Kwa sasa huduma hii inapatikana kwa kundi dogo la watumiaji wa iOS walioko kwenye toleo la majaribio, huku kampuni ikisema itaendelea kupanua upatikanaji wake kadri majaribio yanavyokamilika.
Ikumbukwe kwa watumiaji wa Android: kipengele hicho cha “akaunti mbili kwenye simu moja” kilianza kutolewa rasmi tangu 2023. (Gadgets 360).
Aidha, kwa watumiaji wa iPhone (iOS): tangu Novemba 2025, WhatsApp imetangaza kwamba inaanza kutangaza kipengele hicho kupitia toleo la majaribio (beta), katika baadhi ya simu na baadhi ya watumiaji. (MacRumors)
Maboresho kwenye kipengele cha ‘about’
Katika hatua nyingine, WhatsApp imerejesha kipengele cha about kikiwa kimetengezwa upya ili kiwe kinajitokeza kwa urahisi zaidi.
Maboresho haya yanatoa nafasi ya kuweka ujumbe mfupi wa hali ya mtumiaji kwa mwonekano unaofanana na notes za Instagram.
Kiujumla WhatsApp inatoa fursa ya kuondoa akaunti kwenye simu bila kuifuta kabisa. Mtumiaji anaelekezwa kwenda Settings > Account > Remove account na kuhifadhi backup kabla ya kuthibitisha.
Ili kufuta akaunti moja kwa moja, mtumiaji hufuata njia ya delete account, hatua inayofuta ujumbe, vikundi, backup, na chaneli alizounda.
Kwa mabadiliko haya mapya, WhatsApp inalenga kuongeza urahisi wa mawasiliano kwa watu wanaosimamia majukumu mengi kupitia simu moja.