Dodoma. Serikali imesema kumekuwa na ukiukwaji mkubwa wa sheria, kanuni, taratibu na miiko ya kazi katika utumishi wa umma vikiwemo uzembe na usumbufu unaofanywa na baadhi ya watumishi bila sababu za msingi jambo linalotakiwa kuangaliwa.
Kauli hiyo imetolewa leo Alhamisi 27, 2025 na Naibu Waziri wa Utumishi na Utawala Bora, Regina Qwaray alipokuwa akizungumza na watumishi na watendaji wa Serikali mkoani Iringa.
Taarifa iliyotolewa na kitengo cha habari na mahusiano Wizara ya Utumishi inaeleza kuwa kikao hicho kililenga kupeana maelekezo ya kazi na kuelimishana kuhusu Sheria ya Utumishi wa Umma, Sura 298 na Kanuni zake, ili kuimarisha utendaji kazi na kuboresha utoaji wa huduma kwa watumishi wa umma.
Naibu Waziri amesema utumishi wa umma unaongozwa kwa kuzingatia sheria, kanuni, taratibu na miongozo ambayo inaongoza kushughulikia masuala ya kiutumishi na menejimenti ya rasilimali watu.
“Lakini kumekuwa na ukiukwaji mkubwa wa sheria, kanuni, taratibu na miiko ya kazi katika utumishi wa umma vikiwemo uzembe na usumbufu unaofanywa na baadhi yenu kwa watumishi bila sababu za msingi,” amesema Qwaray.
Amewataka watumishi kubeba jukumu moja la kusimamia rasilimali watu, hivyo wahakikishe wanasimamia kikamilifu majukumu yao kwani rasilimali watu ikisimamiwa vibaya matokeo yake utendaji kazi hushuka na uchumi nao hauwezi kukua inavyotakiwa, kwani inapelekea watumishi na wananchi wengine kutoridhika na utendaji wa Serikali.
Naibu Waziri amesema ili Taifa liwe na amani kila mmoja anapaswa kuhakikisha anatekeleza wajibu wake kwa kufanya kile kinachompasa kukifanya kwa wakati na kwa ufasaha mahala pake, kwani wananchi wanahitaji huduma bora.
“Ninawapongeza wanaofanya vizuri lakini wapo ambao hawawajibiki ipasavyo ambao kwa namna moja au nyingine wanazalisha malalamiko na migogoro isiyokuwa ya lazima mahala pa kazi, hili halipendezi,” amesema Qwaray.
Amesema ofisi ya waziri imekuwa ikipokea barua za kuomba ufafanuzi wa masuala mbalimbali ya kiutumishi ambayo mengi yalishatolewa maelekezo jambo linaloonyesha baadhi ya watu hawawajibiki ipasavyo katika kusimamia sheria.