Dar es Salaam. Waziri wa Nchi, Ofisi ya Rais (Utumishi na Utawala Bora), Ridhiwani Kikwete, ameielekeza Watumishi Housing Investment (WHI) kuongeza kasi ya upatikanaji wa vyanzo vya fedha ili kuimarisha na kupanua ujenzi wa nyumba nafuu kwa watumishi wa umma.
Amesema Dira ya Maendeleo ya Tanzania 2050 inahitaji ujenzi wa takribani nyumba milioni moja, lengo ambalo haliwezi kufikiwa ikiwa WHI itaendelea kutegemea bajeti ya Serikali pekee, kwani Serikali tayari inabeba majukumu mengi na vipaumbele mbalimbali vya Taifa.
Akizungumza katika kikao cha watumishi wa WHI kilichofanyika leo Alhamisi, Novemba 27, 2025 Waziri Kikwete ametoa maelekezo kadhaa ya kuboresha ufanisi wa taasisi hiyo pamoja na kuongeza mapato yake.
“Bajeti ya Serikali lazima igharamie ujenzi wa shule, vituo vya afya na vipaumbele vingine vya Taifa. Ikiwa WHI itategemea bajeti hiyo pekee, ndoto ya kufikia nyumba milioni moja haitatimia.
“Lazima mtumie vyanzo mbalimbali vya fedha ili kufikia lengo lenu la maelfu ya nyumba. Bajeti ya Serikali itabaki kuwa nyongeza tu,” amesema.
Waziri huyo pia ameitaka WHI kukumbatia teknolojia za kidijitali zitakazowawezesha watumishi wa umma kuangalia, kuomba na hata kununua nyumba bila ya kulazimika kutembelea miradi husika moja kwa moja.
“Tunaishi katika dunia ya kidijitali. Watu hawana muda wa kufika kwenye maeneo ya miradi. Ikiwezekana, mtumishi aweze kununua nyumba akiwa popote nchini,” amesema.
Aidha, ameipongeza WHI kwa kuanzisha Mfuko wa Faida, akiuelezea kama hatua bunifu inayofanya vizuri, lakini ameitaka taasisi hiyo kuongeza uhamasishaji wa bidhaa zake.
“Lazima mtangaze kwa upana miradi yenu ya nyumba na Mfuko wa Faida. Watanzania wengi hulalamika kwa sababu hawajui kuhusu miradi iliyokamilika. Elimu kwa umma ni muhimu,” amesema.
Waziri Kikwete amesisitiza pia umuhimu wa kudumisha ubora katika ujenzi, akihimiza matumizi ya teknolojia za kisasa zisizoongeza gharama kwa watumishi.
Kaimu Mkurugenzi Mkuu wa WHI, Stephane Solomon amesema taasisi hiyo inaendesha mifuko miwili, Mfuko wa Nyumba na Mfuko wa Faida ambayo yote inafanya vizuri, na mipango ipo ya kuboresha zaidi.
“Mfuko wa Faida umefikia Sh49 bilioni, na kufikia Juni mwakani tunatarajia uwe umefika Sh54 bilioni, huku gawio kwa wawekezaji likizidi kuongezeka kutoka asilimia 13.9 ya sasa.
“Katika mwaka huu wa fedha tunatarajia kukamilisha ujenzi wa nyumba 221 jijini Dar es Salaam na Dodoma, hususan kwenye maeneo ya wilaya, ili kuhakikisha walimu walioko maeneo hayo wanapata makazi bora na kupunguza changamoto ya upungufu wa nyumba,” amesema.
Pia, amesema ujenzi unaendelea katika mikoa mbalimbali kutokana na ongezeko la mahitaji ya makazi.
“Kwa sasa kiwango cha mauzo ya nyumba zetu kimefikia asilimia 18, lakini tunaendelea kuiomba Serikali kupunguza baadhi ya kodi za vifaa vya ujenzi ili nyumba hizi ziweze kuuzwa kwa bei ya chini zaidi ya asilimia 18,” amesema.
Mkurugenzi wa Fedha, Pascal Massawe, amezungumzia mfumo wa e-Wekeza unaowawezesha watumishi kuwekeza kuanzia Sh57,000 na kupata faida katika kuongeza kipato.
Amesema tangu uzinduzi wake Juni, zaidi ya watumishi 800 wamewekeza Sh54.8 milioni hadi Novemba hii.
Lengo ni kuwasaidia watumishi kuwa na chanzo cha ziada wanapostaafu.
Amesema idadi ya wawekezaji imeongezeka kutoka 200 hadi 800 na inatarajiwa kuvuka 1,000 mwishoni mwa mwaka, huku mkazo ukielekezwa kwenye elimu kwa watumishi ili wachangamkie fursa hiyo.