Kenya. Mwanamuziki na mwigizaji kutoka nchini Kenya, Sanaipei Tande (40) amezua gumzo katika mitandao ya kijamii baada ya kuweka wazi kuwa amekaa muda mrefu bila kuwa kwenye mahusiano sababu kubwa ikiwa ni wanaume kuogopa kumtongoza, hivyo kwasasa yupo tayari kuwa na mwanaume yeyote.
Akizungumza katika mahojiano yake ya hivi karibuni, Sanaipei amesema hana presha ya ndoa wala kutafuta mwanaume wa sifa za ajabu kama wengine wanavyofanya, huku akisisitiza kuwa maisha yamemfundisha kuwa mapenzi hayahitaji masharti magumu, bali yanahitaji watu wawili wanaoelewana na kuheshimiana.
Aidha baada ya kujadiliwa sana katika mitandao ya kijamii, ambapo baadhi ya watu walisema msanii huyo anatamani mwanaume mwenye fedha na maisha ya kifahari, Sanaipei amekanusha kauli hiyo na kuweka wazi kuwa kwa sasa yupo tayari kumpokea mwanaume yeyote, ilimradi awe na heshima, tabia nzuri na awe mkweli.
Hata hivyo amefichua moja ya sababu ya kuwa single akieleza ni wanaume kuogopa kumtongoza wakiamini kuwa anahitaji mtu mwenye mali, wakati ukweli ni kwamba yeye hutanguliza utu kuliko kipato.
Ikumbukwe miaka ya nyumba msanii huyo amewahi kuhusishwa kutoka kimapenzi na mastaa mbalimbali kutoka Kenya lakini hakukuwa na ushahidi madhubuti wa kulithibitisha hilo.
Sanaipei Tande ambaye alitambulika kupitia wimbo wa ‘Amina’ amekuwa akifanya vizuri katika tasnia ya muziki pamoja uigizaji huku akijulikana kwa ngoma zake kama Mdaka Mdakiwa, Jali, Yupo Na Wewe, Mfalme wa Mapenzi, Najuta na nyinginezo.