WAKATI mechi za Ligi ya Championship zikitarajiwa kuendelea tena keshokutwa Jumapili, Stand United (Chama la Wana), baada ya kucheza mechi sita mfululizo bila kupata ushindi hatimaye juzi ilizinduka kwa kuichapa TMA Stars kwa bao 1-0 na kujinasua mkiani mwa msimamo wa ligi hiyo.
Chama la Wana iliyokuwa imeganda mkiani kutokana na kudaiwa pointi zilizotokana na kupewa adhabu ya Bodi ya Ligi, ilipata ushindi huo kwa bao la dakika ya 85 lililowekwa kimiani na Oscar Tarimo.
Ushindi huo umeifanya timu hiyo iliyowahi kutamba katika Ligi Kuu Bara kabla ya kushuka daraja misimu mitano iliyopita, kufikisha pointi 1 na kuchupa kwa nafasi mbili kutoka mkiani mwa msimamo wa ligi hiyo wenye timu 16 hadi nafasi ya 14.
Awali Stand katika mechi ya mwisho kabla ya juzi ilitoka sare na kusaliwa na deni la pointi tatu zilizotokana na adhabu iliyopewa na TFF na kwa ushindi huo imeifanya kujikomboa na deni na kuwapa shangwe mashabiki wao waliojitokeza kwenye Uwanja wa Kambarage Shinyanga.
Kocha wa Stand, Idd Nassor ‘Cheche’ akizungumzi ushindi huo, amesema unazidi kuongeza morali kwa wachezaji kwa mechi zijazo ikiwamo ya keshokutwa dhidi ya Mbuni FC ambao pia wanatokea Arusha na timu ya jeshi kama ilivyokuwa kwa TMA Stars.
Mbuni imetoka kupata ushindi wa bao 1-0 dhidi ya Gunners, kitu kinachofanya pambano la keshokutwa kuwa la ushindani kwa timu hizo.
Katika mechi nyingine za ligi hiyo zilizopigwa juzi Bigman ilipata ushindi wa mabao 2-0 dhidi ya Songea United ilhali Mbeya Kwanza ikiwa nyumbani ilipata ushindi wa mabao 2-1 dhidi ya Kengold, huku maafande wa Polisi Tanzania ikitoshana nguvu na maafande wenzao wa Transit Camp kwa kufungana bao 1-1.
Mechi nyingine za keshokutwa Jumapili zitazikutanisha Bigman dhidi ya KenGold, Gunners itakayoialika TMA Stars na Wanakimanumanu, African Sports itakwaruzana na maafande wa Transit Camp.
Jumatatu kutakuwa na mechi nyingine tatu ambapo vinara Geita Gold itakuwa wenyeji wa B19, huku Kagera Sugar itaialika Hausung mjini Bukoba na Barberian itaikaribisha Polisi Tanzania.