Dar es Salaam. Mahakama Kuu Masjala Ndogo Dar es Salaam imetupilia mbali shauri la maombi ya kuidharau Mahakama hiyo lililokuwa linawakabili Makamu Mwenyekiti wa Chadema Bara, John Heche, Katibu Mkuu John Mnyika na wenzao kwa madai ya kukiuka amri yake ya kukizuia chama hicho kufanya shughuli za kisiasa na kutumia mali za chama hicho hadi hapo kesi ya mgogoro wa mgawanyo wa rasilimali baina ya Chadema Bara na Chadema Zanzibar itakapoamuliwa.
Shauri hilo lilikuwa limefunguliwa na Said Issa Mohamed, Makamu Mwenyekiti mstaafu wa Chadema, Zanzibar na wajumbe wa Bodi ya Wadhamini wa Chadema kutoka Zanzibar, Ahmed Rashid Khamis na Maulida Anna Komu, ambao ni walalamikaji katika kesi ya msingi namba 8323 ya mwaka 2025.
Mbali na Heche na Mnyika, wajibu maombi wengine katika shauri hilo la madai ya kudharau amri ya mahakama hiyo ni Rose Mayemba, Brenda Rupia, Hilda Newton, Twaha Mwaipaya Gervas Bernard Lyenda, Wadhamini Waliosajiliwa wa Chadema na Katibu Mkuu Chadema.
Hivyo waombaji walikuwa wanaiomba mahakama hiyo iamuru wafungwe kama wafungwa wa madai kwa kuidharau mahakama kwa madai hayo ya kukiuka amri yake hiyo .
Hata hivyo mahakama hiyo katika uamuzi wale uliotolewa na. Jaji Awamu Mbagwa leo, Ijumaa, Novemba 28,2025 imelitupilia mbali shaueo hilo dhidi ya Heche, Mnyika na wenzake baada ya kukubaliana na hoja moja ya pingamizi kuwa limefunguliwa nje ya muda wa kisheria wa siku 60.