MANCHESTER, ENGLAND: KOCHA wa Manchester United, Ruben Amorim yupo tayari kuruhusu wachezaji watatu kuondoka dirisha lijalo la usajili la Januari.
Man United ambayo mfululizo wao wa kucheza mechi tano bila kupoteza wa Man United ulisimamishwa Jumatatu baada ya kupoteza mbele ya Everton kwa bao 1-0, kwa sasa inashika nafasi ya 10 ikiwa na pointi 18 ilizopata katika mechi 12.
Tovuti ya aily Mail, imefichua Diego Leon, Sekou Kone na Ayden Heaven ni wachezaji watatu ambao wana zaidi ya asilimia 80 za kutolewa kwa mkopo Januari hii ili kwenda kupata muda mwingi zaidi wa kucheza.
Leon, aliyejiunga na mashetani hao wekundu dirisha la majira ya kiangazi mwaka jana bado hajacheza mechi yoyote ya kikosi cha kwanza cha Man United.
Beki huyu wa kushoto kutoka Paraguay, mwenye umri wa miaka 18, amekuwa akisugua benchi mbele ya Luke Shaw na Patrick Dorgu ambao ndio wanaonekana kuaminiwa zaidi na Amorim.
Kone ambaye anatokea Mali kwa upande wake haonekani kabisa katika kikosi cha kwanza na mara kadhaa amekuwa akicheza timu ya vijana chini ya miaka 21.
Vilevile Heaven, msimu huu amecheza mechi tatu za michuano yote.
Mbali ya kuruhusu kuondoka kwa wachezaji hao, Amorim inadaiwa kutaka kusajili tena Januari kutokana na majeruhi waliopo kikosini kwake pamoja na kuwakosa baadhi ya mastaa wake tegemeo kama Bryan Mbeumo wa Cameroon, Amad Diallo wa Ivory Coast na Noussair Mazraoui wa Morocco ambao wote wanatarajiwa kuondoka kujiunga na mataifa yao kwa ajili ya AFCON.
Man United Iitakuwa na kibarua kigumu kesho katika Ligi Kuu England itakapokutana na Crystal Palace ugenini.