MAAFANDE wa Mashujaa ya Kigoma leo jioni ilishindwa kurejea kileleni mwa msimamo wa Ligi Kuu Bara baada ya kubanwa mbavu nyumbani na Dodoma Jiji na kutoka suluhu, huku kipa wa timu hiyo, Erick Johola akiendelea kung’ara akiong’oza kwa clean sheet, akifikisha tano.

Ikicheza kwenye Uwanja wa Lake Tanganyika, Mashujaa ilishindwa kuendeleza wimbi la ushindi kwa kulazishwa sare hiyo inayoifanya ifikishe pointi 12 na kusalia nafasi ya tatu katika msimamo nyuma ya vinara JKT Tanzania yenye pointi 13 na Pamba Jiji iliyolingana nao pointi ila inatofautiana nao mabao.

Pamba imefunga mabao manane na kufunga sita, wakati Mashujaa iliyotoka kushinda mechi mbili zilizopita kwenye uwanja huo wa nyumbani dhidi ya Namungo na Mbeya City kila mmoja ikiichapa kwa bao 1-0 yenyewe imefunga mabao matano na manne ikicheza mechi nane.

MASHU 01

Dodoma iliyotoka kupoteza ugenini kwa mabao 2-0 mbele ya Namungo, katika mechi ya leo iliupiga mwingi kwa kutengeneza nafasi nyingi kupitia Idd Kipagwile, Willy Edward na Yasin Mgaza, lakini kazi kubwa iliyofanywa na Johola iliwanyima fursa la kutoka na ushindi wa kwanza ugenini msimu huu katika ligi hiyo, kwani kipa huyo wa zamani wa Yanga na Aigle Noir ya Burundi aliokoa michomo kadhaa.

Hata hivyo, wenyeji nao watajilaumu kwa kushindwa kupata ushindi mwingine nyumbani kwa nafasi zilizotengenezwa katika vipindi vyote viwili, japo kazi ya kipa Ally Salim katika kulilinda lango liliibeba Dodoma Jiji iliyotimiza mechi ya nane msimu huu, ikiwa pia ni ya tano ugenini bila ushindi.

Matokeo hayo kwa Dodoma hata hivyo, yameisaidia kufikisha pointi sita na kulingana na TZ Prisons ikitofautiana nao mabao ya kufunga na kufungwa na kuchupa kwa nafasi moja katika msimamo ikitoka nafasi ya 15 hadi ya 14 ikiishusha Azam FC yenye pointi tano. Hata hivyo, Azam imecheza mechi tatu tofauti na Dodoma yenye mechi nane kama Mashujaa wakati TZ Prisons imecheza mechi sita hadi sasa katika ligi hiyo iliyoanza rasmi kwa msimu huu Septemba 17.

MASHU 02

Baada ya mechi hiyo, Mashujaa sasa inarudi kujiandaa tena kwa ajili ya kuipokea Coastal Union iliyotoka kupata ushindi wa mabao 2-0 nyumbani mbele ya Mbeya City.

Mechi hiyo inatarajiwa kupigwa Jumatatu kwenye Uwanja wa Lake Tanganyika, mjini Kigoma.

Leave a Reply

Your email address will not be published. Required fields are marked *